निर्माणाधीन नाट्यघरमा आगलागी

हरिप्रसाद कोइराला

उर्लाबारी, माघ ३ गते । मोरङको सुन्दरहरैँचा –८ सलकपुरमा निर्माणाधीन नाट्यघरमा आगलागी भएको छ । बिहीबार अपरान्ह साढ ३ बजेतिर खरले छाएका दुईवटा घरमध्ये एउटा घरमा आगलागी भएको हो । 

सुन्दरहरैँचा –८ का वडाध्यक्ष खेमप्रसाद न्यौपानेका अनुसार नगरपालिकाले लिजमा लिएर दुई वटा पौराणिक शैलीका घर बनाएका थियो । बाँस र खरमात्र प्रयोग गरी निर्माण गरिएका दुई घरमध्ये एउटा घर जलेर नष्ट भएको वडाध्यक्ष न्यौपानेले जानकारी दिनुभयो । 

सुन्दरहरैँचा नगरपालिकाको वारुणयन्त्र मर्मतका लागि पठाइएकाले आगजनीबाट घर जोगाउन नसकिएको उहाँले बताउनुभयो । ढिलोगरी बेलबारीबाट आएको वारुणयन्त्र, सशस्त्र प्रहरी र स्थानीयको सहयोगमा आगो नियन्त्रणमा लिइएका छ । आगजनीबाट झण्डै चार लाख क्षति भएको छ ।