भूकम्प सुरक्षा दिवसमा सचेतनामूलक कार्यक्रम

बाबुराम देवकोटा 

सिन्धुलीमाढी, माघ २ गते । सिन्धुली जिल्लामा २७ औं राष्ट्रिय भूकम्प सुरक्षा दिवसको अवसरमा बुधबार प्रभातफेरी तथा सचेतनामूलक कार्यक्रम सम्पन्न गरिएको छ । 

जिल्ला प्रशासन कार्यालयको आयोजना र सहरी विकास तथा भवन कार्यालयको संयोजनामा उक्त कार्यक्रम सम्पन्न भएको हो । जिल्ला सदरमुकाम सिन्धुलीमाढीमा सम्पन्न उक्त कार्यक्रममा जनप्रतिनिधिहरु, कार्यालय प्रमुखहरु, सुरक्षा निकायका प्रमुखहरु, सुरक्षाकर्मी, विभिन्न सामाजिक सङ्घ संस्थाका प्रतिनिधिहरुको सहभागिता थियो ।

भूकम्प सम्बन्धी सचेतनामूलक प्लेकार्डसहित जिल्ला रेडक्रस शाखाको भवन अगाडिबाट सुरु भएको प्रभातफेरी बजार परिक्रमा गरी लोकतान्त्रिक चोकमा पुगेर कोण सभामा परिणत भएको थियो । उक्त सभालाई सम्बोधन गर्दै प्रमुख जिल्ला अधिकारी लीलाप्रसाद शर्माले भूकम्पबाट बच्न पहिले नै सावधानी अपनाउनु पर्ने र भूकम्प प्रतिरोधी संरचना बनाउन सबैले ध्यान दिनुपर्ने बताउनुभयो ।

त्यस्तै साना सहर आयोजना खुर्कोटले २७ औं राष्ट्रिय भूकम्प सुरक्षा दिवसको अवसरमा बुधबारदेखि सातदिने भवन निर्माणसम्बन्धी डकर्मी तालिम सुरु गरेको छ । उक्त तालिममा भूकम्प प्रतिरोधी संरचना बनाउन सिकाइने र ३० जनाको सहभागिता रहेको कार्यालयले जनाएको छ ।