बुलबुले समाचारदाता
सुर्खेत, माघ १ गते । कर्णाली प्रदेशका मुख्यमन्त्री यामलाल कँडेल यतिबेला पूर्वाधार निर्माणको अवस्था बुझ्न स्थलगत अध्ययनमा केन्द्रित हुनुभएको छ । प्रदेशका विभिन्न जिल्लामा भइरहेको विकास निर्माणको अवस्था बारेमा जानकारी लिने उद्देश्यले स्थलगत रूपमै पुग्ने गर्नुभएको हो । शनिबार मुख्यमन्त्री कँडेलले आधा दर्जनभन्दा बढी आयोजनाको अवलोकन गर्नुभएको छ ।
पश्चिम सुर्खेतका तीन स्थानीय तहमा सञ्चालन भएका विकास निर्माणबारे अनुगमन गर्नुभएको हो । मदन भण्डारी राजमार्गको पश्चिम खण्डको कामका बारेमा उहाँले जानकारी लिनुभएको छ । यसै गरी लखरपाटा सिमेन्ट कारखानाको उद्योग सञ्चालन गर्ने प्रस्तावित क्षेत्र चौकुने गाउँपालिका–९, सुनकाँडाको अवलोकनसमेत उहाँले गर्नुभएको छ । सम्भावना हुँदाहुँदै पनि निर्माण कम्पनीले काम गर्न नसकेको पाइएको मुख्यमन्त्री कँडेलले बताउनुभयो । सिमेन्ट उद्योगका लागि ५४५ रोपनी निजी जग्गामा करिब तीन हजार एक सय मिटर तारबार गरिएको कँडेलको भनाइ छ ।
अबको केही समयमा ३३ केभिए लाइन विस्तार हुने पनि उहाँले बताउनुभयो । उद्योग सञ्चालन क्षेत्रका स्थानीयसँग छलफलसमेत गर्नुभएको थियो । यसै गरी प्रदेश सरकारको लगानीमा नाला र कालोपत्रे निर्माण भइरहेको घाटगाउँ–गुटु १४ किलोमिटर सडक र सुर्खेत, घाटगाउँ र कैलाली मोहन्याल जोड्ने चिप्ले पुलको अवलोकन गरिएको छ । घाटगाउँकै भेरीकर्णाली दोभान, शिवधाम र पञ्चपुरी नगरपालिका–१० र ११ तातोपानी क्षेत्रमा प्रदेश सरकारको लगानीमा कालोपत्रे भइरहेको सडकको समेत मुख्यमन्त्री कँडेलले अवलोकन गर्नुभएको हो ।
मदन भण्डारी राजमार्ग अन्तर्गत पश्चिम सुर्खेतको बड्डीचौर–खम्बागाडे सडकखण्डको काम सुस्त गतिमा भइरहेको छ । हालसम्म २२ प्रतिशत भौतिक प्रगति भएको छ । वित्तीय प्रगति २० प्रतिशत भएको छ । उक्त सडकखण्डको साढे १२ किलोमिटरमा सडक निर्माणको काम भइरहेको हो । यो सडकखण्डका लागि प्रदेश सरकारले ४२ करोड बजेट विनियोजन गरेको छ । अनक जयदेवी जेभी बाँकेले ४२ करोड ४७ लाख ६१ हजार रुपियाँमा प्रदेश सरकारको पूर्वाधार विकास निर्देशनालयसँग सम्झौता गरेको हो ।
२०७९ सालदेखि काम सुरु भएको उक्त खण्डमा २०८१ असार १५ गतेसम्म काम सम्पन्न गर्नुपर्ने भए पनि काम अझै अधुरै छ । म्याद थप गरेर निर्माणको काम भइरहेको हो । २०८२ साल असार १२ गतेसम्मका लागि म्याद थपिएको छ । उक्त खण्डमा अहिले निर्माणको काम कछुवा गतिमा भइरहेको छ । कलभर्ट निर्माण, नाला निर्माण र सडक विस्तारको काम भइरहेको पूर्वाधार विकास निर्देशनालयका सूचना अधिकारी वीरेन्द्रजङ्ग शाहीले बताउनुभयो । उहाँका अनुसार निर्माण कम्पनीको लापर्बाहीका कारण कामको प्रगति न्यून रहेको छ ।
मदन भण्डारी राजमार्ग अन्तर्गत पश्चिम सुर्खेतका दुई खण्डमा नयाँ ठेक्का सम्झौता गरेर काम अघि बढाइएको छ । चौकुने गाउँपालिकाको वडा नं. ३ बल्देदेखि वडा नं. २ लगामसम्म र पञ्चपुरी नगरपालिकाको वडा नं. ३ चौरदेखि वडा नं. ९ विद्यापुरसम्म ठेक्का सम्झौता गरिएको हो । दुई खण्डमा गरी २५ किलोमिटर सडक निर्माण गरिने मदन भण्डारी राजमार्ग योजना कार्यालय सुर्खेतले जनाएको छ । दुई खण्डलाई एउटै प्याकेज गरी सडक निर्माण गर्न लागिएको हो । जस अन्तर्गत बल्देदेखि लगामसम्म १५ किलोमिटर र चौरदेखि विद्यापुरसम्म १० किलोमिटर सडक निर्माण गरिने छ । ठेक्का सम्झौता भई सडक निर्माणको काम धमाधम अघि बढेको राजमार्ग योजना कार्यालयका इन्जिनियर रेशम ओलीले बताउनुभयो । उहाँका अनुसार दुई खण्डको कामलाई एउटै प्याकेजमा गरी सडक निर्माण गर्न लागिएको हो ।
दिवा यति बिल्डर्स सातदोबाटो ललितपुर र मदन भण्डारी राजमार्ग योजना कार्यालय सुर्खेतबिच ठेक्का सम्झौता भएको छ । २०८१ भदौ १४ देखि २०८४ भदौ १४ गतेसम्म निर्माण सम्पन्न गर्नुपर्ने सम्झौतामा उल्लेख गरिएको छ । एक अर्ब २६ करोड लागतमा २५ किलोमिटर सडक निर्माणको सम्झौता गरिएको हो । यो आयोजना अघि बढेसँगै पश्चिमका तिनै खण्डमा काम सुरु भएको छ ।
यसअघि बड्डीचौर–खम्बागाडे र विद्यापुर–बल्दे सडकखण्ड निर्माणको काम अघि बढाइएको थियो । ४५ किलोमिटरको सडकलाई तीन खण्डमा विभाजन गरेर निर्माण थालिएको छ । विद्यापुर–बल्दे सडकखण्डमा निर्माणको काम धमाधम भइरहेको छ । पश्चिम क्षेत्रका तीन खण्डमध्ये यो तेस्रो खण्ड हो । २२ किलोमिटर सडकखण्ड निर्माणका लागि एक अर्ब २१ करोड रुपियाँमा काम सम्पन्न गर्ने गरी बानियाँ मोतीदान डिएस जेभी काठमाडौँले ठेक्का सम्झौता गरेको छ ।
सम्झौता अनुसार २०७९ फागुन १७ देखि सुरु भएको काम २०८२ फागुन १६ गतेसम्म सम्पन्न गरिसक्नुपर्ने छ । उक्त खण्डको भौतिक प्रगति ६० प्रतिशत हासिल भएको छ भने वित्तीय प्रगति ५५ प्रतिशत भएको छ । यो खण्डमा भने काम तीव्र गतिमा भइरहेको छ ।
