शेरबहादुर राई
ओखलढुङ्गा, पुस २९ गते । चिया पकाउन बालिएको आगो पूरा घरमा फैलिएर आगलागी भएको छ । आगलागीमा परेर फुसको छानो भएको ढुङ्गा माटोले बनेको एक तले घर जल्दा करिब १५ लाख बराबरको क्षति भएको छ ।
सुनकोशी गाउँपालिका –९ ककनीका मेखबहादुर तामाङको घरमा आगलागी हुँदा १५ लाख बराबरको क्षति भएको हो । विहान चिया पकाउने क्रममा अचानक घरमा सल्केको आगोले घरमा भएको एक तोलाको सुनको तिलहरी, नगद ३५ हजार, अन्नपात, लत्ता कपडा, भाँडा वर्तन पूर्णरुपमा जलेर नष्ट भएको जिल्ला प्रहरी कार्यालय ओखलढुङ्गाका प्रहरी निरीक्षक विजय कार्कीले बताउनुभयो ।
आगलागीमा मानवीय र पशु चौपायाको क्षति नभएको प्रहरी निरीक्षक कार्कीले जानकारी दिनुभयो । घटनाको विषयमा थप अनुसन्धान भइरहेको प्रहरीले जनाएको छ । केही दिनअघि मात्र खिजिदेम्बा गाउँपालिका –५ खिजिफलाटे बजारको कपडा पसल र होटल भएको एक घरमा आगलागी हुदा करिब २२ लाख क्षति भएको थियो ।
