छुट्टाछ्ट्टै दुर्घटनामा पाँच घाइते

रवीन्द्र उप्रेती

बर्दीबास, पुस २६ गते । बर्दीबासको छुट्टाछुट्टै तीन ठाँउमा भएको मोटरसाइकल दुर्घटनामा पाँच जना घाइते भएका छन् । बर्दीबास १४ स्थित पूर्वपश्चिम लोकमार्गमा विपरीत दिशातर्फ गइरहेको दुई वटा मोटरसाईकल आपसमा ठक्कर खाँदा दुवै चालक घाइते भएको प्रहरीले जनाएको छ । 

इलाका प्रहरी बर्दीबासका अनुसार १२ प ७३१६ नं मोटरसाइकलबाट सर्लाहीतर्फ जाँदै गरेका धनुषा गणेशमान चारनाथ ६ गोदारका ३९ वर्षीय राकेशलाल कर्णको बायाँ खुट्टा भाँचिएको छ । त्यस्तै बाप–०२–०५४ प ६९८४ नम्बरका मोटरसाइकलबाट पूर्वतर्फ आउँदै गरेका महोत्तरी गौशाला १ का १६ वर्षीय राकेश सिंहको दाहिने हात भाँचिएको छ । 

बर्दीबास जलेश्वर फिडर रोडको वडा नं १४ तामाङ टोलस्थित भित्री सडकमा बा ३३ प ९५२१ नंको स्कुटरले ठक्कर दिँदा ७ वर्षीय पैदलयात्रु संस्कार तामाङ घाइते भएको प्रहरीले जनाएको छ । बालक तामाङको दुबै हात र खुट्टामा चोट लागेको छ । 

घाइतेहरुलाई बर्दीबासस्थित शुभ स्वस्तिक अस्पतालमा भर्ना गरिएको छ । घाइतेहरुको अवस्था मध्यम रहेको प्रहरीले जनाएको छ । यसअघि राती ९ बजेतिर बर्दीबास १ स्थित पूर्वपश्चिम लोकमार्गमा पश्चिमतर्फ जाँदै गरेको स ९ प ७०३७ नंको मोटरसाइकलले ठक्कर दिंदा एक पैदल यात्री घाइते भएका छन् । 

दुर्घटनामा घाइते सिराहा धनगढी १३ का ५० वर्षीय पैदल यात्री गोपाल मिझारको अवस्था गम्भीर छ । उहाँको टाउको र छातीमा गम्भीर चोट लागेको छ । सोही दुर्घटनामा परी महोत्तरी सोनमा ५ खयरवन्नीका २४ वर्षीय मोटरसाइकल चालक अखिलेशकुमार महतोको ओठ, खुट्टा र टाउकोमा चोट छ । 

इलाका प्रहरी बर्दीबासका डिएसपी रेवतीरमण पोखरेलका अनुसार अवस्था थप गम्भीर भएपछि मिझारलाई जनकपुरस्थित जानकी हेल्थ केयरबाट काठमाडौं ट्रमा सेन्टर लगिएको छ । अर्का घाइते महतोको भने सोही असपतालमा उपचार भइरहेको डिएसपी पोखरेलले बताउनुभयो । दुर्घटनामा संलग्न ४ वटै मोटरसाइकललाई बर्दीबास प्रहरीले नियन्त्रणमा लिएको छ ।