गोलभेँडालाई राम्रो मूल्य

सर्लाही समाचारदाता

सर्लाही, मङ्सिर १० गते । सर्लाहीका बजारमा स्थानीय किसानले उत्पादन गरेको गोलभेँडा भित्रिन थालेको छ । 

यस वर्ष गत असोज दोस्रो साताको भारी वर्षाका कारण गोलभेँडा फल्न ढिलो भएकाले ढिलो मात्र नयाँ उत्पादन आएको हो ।

अविरल वर्षाबाट गोलभेँडाको बोट जोगाउन सफल भएका किसानले भने अहिले बजारमा धमाधम बेच्न थालेका हुन् । 

बजारमा थोरै परिमाणमा गोलभेँडा भित्रिइरहेकाले किसानले सिजनको सुरुमा राम्रो मूल्य पाएका छन् । मधेश प्रदेशको प्रमुख तरकारी बजारका रूपमा रहेको लालबन्दी थोक तरकारी बजारमा स्थानीय जातको गोलभेँडा किसानले प्रतिक्रेट एक हजार आठ सय रुपियाँदेखि दुई हजार चार सय रुपियाँसम्ममा बिक्री गरिरहेका छन् । 

एक क्रेट गोलभेँडा बिक्री गर्दा किसानले प्रतिकेजी ७२ रुपियाँदेखि ९६ रुपियाँसम्म मूल्य पाइरहेका छन् । यही गोलभेँडा उपभोक्ताले भने खुद्रामा प्रतिकेजी १५० रुपियाँसम्ममा खरिद गरेर उपभोग गरिरहेका छन् । 

बजारमा स्थानीय उत्पादन पर्याप्त नभएसम्म भाउ यस्तै रहने खुद्रा व्यापारीले बताएका छन् । सर्लाहीमा उत्तरी भेगको ईश्वरपुर, लालबन्दी, हरिवन र बागमती नगरपालिकामा  व्यावसायिक रूपमा गोलभेँडा खेती हुने गरेको छ । 

लालबन्दी नगरपालिका–११, हिरापुरका किसान तिलकबहादुर थिङले अबको दुई साताभित्र बजारमा पर्याप्त मात्रामा गोलभेँडा भित्रिने बताउनुभयो । असोजमा धेरै पानी परेर गोलभेँडाको बेर्ना सार्न नै ढिलो हुँदा मङ्सिर मध्य हुन लाग्दासमेत गोलभेँडा फलाउन नसकेको उहाँले जानकारी दिनुभयो । 

सबै किसानले एकै पटक धेरै मात्रामा गोलभेँडा बजार ल्याउन थालेपछि भाउ भने ह्वात्तै घट्ने गरेको छ । लालबन्दी थोक तरकारी बजारमा हिजोआज स्थानीय जातको गोलभेँडा दुई सय क्रेटको हाराहारीमा आइरहेको छ । 

त्यसमध्ये थोरै परिमाणमा काठमाडौँ पठाउने गरिए पनि सबै जसो गोलभेँडा स्थानीय स्तरकै हाटबजारमा खपत भइरहेको लालबन्दी थोक तरकारी बजारका व्यापारी मोहम्मद उस्मानले बताउनुभयो ।