'अनुपमा धर्ती' कविता सङ्ग्रह सार्वजनिक

वसन्त पराजुली

नारायणगढ, मङ्सिर ९ गते । कवि गोविन्दराज विनोदीको अङ्ग्रेजी अनुवादसहितको 'अनुपमा धर्ती' कविता सङ्ग्रह सार्वजनिक भएको छ । त्रिवेणी साहित्य प्रतिष्ठानको आयोजनामा आइतबार गैँडाकोटमा सम्पन्न कार्यक्रममा सो कृति विमोचन गरिएको हो ।

स्रग्विणी छन्दमा लेखिएको सो कृति भित्रका कविता शत सङ्ख्यात्मक श्लोकमा रचिएका छन् । कार्यक्रममा बोल्दै कवि विनोदीले नेपाल भूमिलाई आफ्नो जननी मानेर विश्वभरमै सुन्दरता भएको कवितामा उल्लेख गरेको जानकारी दिनुभयो ।

लेखकका यसअघि १७ वटा विभिन्न कृतिहरू प्रकाशनमा भएका छन् । 'अनुपमा धर्ती' कवितालाई प्रेम सिग्देलले अङ्ग्रेजीमा अनुवाद गर्नुभएको हो ।

यस्तै, कार्यक्रममा लेखक सृजन लम्सालको निबन्ध सङ्ग्रह दृष्टि बिम्ब पनि विमोचन गरिएको छ । लम्सालका यसअघि ११ वटा कृतिहरू प्रकाशन भएका छन् ।