गोरखापत्र समाचारदाता
काठमाडौँ, मङ्सिर ९ गते । चलचित्र ‘परालको आगो’ मा अभिनेतृ सुहाना थापा अनुबन्धित हुनुभएको छ । निर्माता कम्पनी हरिओम सिने मेकर्सका तर्फबाट सुशील पोखरेल र थापाबिच लिखित सहमति भएको छ । पोखरेलले सामाजिक सञ्जालमार्फत अभिनेतृ थापासँग चलचित्रका लागि लिखित सहमति भएको जानकारी दिनुभएको हो ।
कथाकार गुरुप्रसाद मैनालीको कृति ‘परालको आगो’ मा केन्द्रित रहेर चलचित्र बन्न लागेको हो । मैनाली कथा पुरस्कार ट्रस्टले केही दिनअघि ‘मर्म नबिग्रने’ सर्तमा चलचित्र निर्माणको अनुमति दिएको थियो । ‘परालको आगो’ मैनालीको कथासङ्ग्रह ‘नासो’ मा सङ्गृहीत छ । कथा ‘परालको आगो’ मा दुई पात्र चामे र गौँथलीको झैँ झगडालाई प्रस्तुत गरिएको छ । लक्ष्मण सुनारले निर्देशन गर्नुहुने चलचित्रको प्रदर्शनी २०८२ सालको दसैँमा तय गरिएको छ ।
