दुर्घटनामा दुईको मृत्यु

रेखीराम राना

तानसेन, मङ्सिर ६ गते । पाल्पामा पिकअप जिपको ठक्करबाट पैदलयात्रीको मृत्यु भएको छ । मृत्यु हुनेमा रैनादेवी छहरा गाउँपालिका –१, सिद्धेश्वरका ४२ वर्षीय खड्कबहादुर पुन रहनुभएको छ । 

बिहीबार बेलुकी ६ बजेतिर रैनादेवी छहरा –४, धजाबान्नेस्थित अमलाबास–भुवनपोखरी भित्री कच्ची सडक खण्डमा भुवनपोखरीबाट सिद्धेश्वर जाँदै गरेको लु १ ज ४२३१ नम्बरको पिकअप जिपले बाटोमा हिडिरहनुभएका पुनलाई ठक्कर दिएको थियो । 

जिपको ठक्करबाट गम्भीर घाइते हुनुभएका पुनको उपचारका लागि तानसेनस्थित लुम्विनी मेडिकल कलेज प्रभासमा ल्याइए पनि चिकित्सकले मृत घोषणा गरेका थिए । घटनाबारे थप अनुसन्धान भइरहेको जिल्ला प्रहरी कार्यालय पाल्पाका प्रहरी नायव उपरीक्षक सुनिल मल्लले जानकारी दिनुभयो । 

खोलामा डुबेर मृत्यु 

यसैबिच जिल्लाको माथागढी –३, सिमलघाट बस्ने २८ वर्षीय निलप्रसाद घर्ती तिनाउ खोलामा मृत फेला परेको प्रहरीले जनाएको छ । 

बिहीबार दिउँसो घर्ती तिनाउ खोलाको सिमलघाटनजिक खोलामा मृत फेला परेको जिल्ला प्रहरी कार्यालय पाल्पाले जनाएको छ । घर्तीको तिनाउ खोलामा डुबेर मृत्यु भएको हुनसक्ने प्रहरीले अनुमान गरेको छ । 

घर्तीको के कारणले मृत्यु भएको हो भन्ने बारेमा प्रहरीले अनुसन्धान गरिरहेको जिल्ला प्रहरी कार्यालय पाल्पाका प्रहरी नायव उपरीक्षक सुनिल मल्लले जानकारी दिनुभयो ।