रेखीराम राना
तानसेन, मङ्सिर ६ गते । पाल्पामा ट्रक दुर्घटना हुँदा एक जना घाइते भएका छन् । घाइते हुनेमा स्याङ्जाको गल्याङ् –८ का २४ वर्षीय सन्दीप सुनारी रहनुभएको छ ।
सिद्धार्थ राजमार्ग हुँदै बिहीबार बिहान पाल्पादेखि पोखरा जाँदै गरेको ग २ ख १००९ नम्बरको इँटा बोकेको ट्रक पाल्पाको माथागढी –१, स्थित अगाहाखोला नजिकै दुर्घटना भएको प्रहरीले जनाएको छ । घाइते ट्रक चालक सुनारीको तानसेनस्थित लुम्बिनी मेडिकल कलेज प्रभासमा उपचार भइरहेको छ ।
ट्रक सडकदेखि एकसय मिटर तल खसेको जिल्ला प्रहरी कार्यालय पाल्पाका प्रहरी नायब उपरीक्षक सुनिल मल्लले जानकारी दिनुभयो । घटनाबारेमा थप अनुसन्धान भइरहेको उहाँले बताउनुभयो । घाइते सुनारीको अवस्था मध्यम रहेको अस्पतालले जनाएको छ ।
