त्रिभुवन राजपथमा ट्रक दुर्घटना : चालकसहित तीन घाइते

राममणि दाहाल

हेटौँडा, मङ्सिर ३ गते । त्रिभुवन राजपथ सडक अन्तर्गत मकवानपुरको भीमफेदी गाउँपालिका ९ स्थित महाभीर खोल्सामा ट्रक दुर्घटना हुँदा तीन जना घाइते भएका छन् । 

झापाबाट काठमाडौँतर्फ बाँस लिएर जाँदै गरेको प्रदेश १–००२–०१ ख ९७०७ नं.को ट्रक सोमबार बिहान आफैँ अनियन्त्रित भई सडकबाट करिब २० मिटर तल खोल्सामा खसेपछि दुर्घटना भएको बागमती प्रदेश प्रहरी कार्यालय, हेटौँडाले जनाएको छ । 

ट्रकमा चालकसहित तीन जना सवार रहेकोमा झापा दमक नगरपालिका ९ बस्ने वर्ष १४ का जनक नेपाल बायाँ हात खुटामा चोट लागेकोले उपचारको लागि काठमाडौँ पठाइएको छ ।

दुर्घटनामा परी घाइतेभएका ट्रक चालक सोही स्थानका वर्ष ४७ का कृष्णप्रसाद भण्डारी र ट्रकमा सवार झापा कमल गाउँपालिका ७ का वर्ष २८ का करण चौधरीको स्थानीय मेडिकलमा उपचारभएको प्रहरीले जनाएको छ । दुर्घटनास्थल प्रहरी चौकी भैँसेबाट करिब २४ किमी उत्तरमा रहेको छ ।