प्रेमराज सिम्खडा
कालीकोट, मङ्सिर ३ गते । कालीकोट जिल्लाको शुभकालीका गाउँपालिका वडा–४ स्थित रारामा करेन्ट लागेर एक जनाको मृत्यु भएको छ ।
सोमबार बिहान विद्युतको पोल चढ्ने क्रममा करेन्ट लागेर २६ वर्षीय वीरेन्द्र चौलागाईको मृत्यु भएको हो । जिल्ला प्रहरी कार्यालय कालीकोटका प्रहरी प्रमुख टेकबहादुर रावतले घटनाबारे पुष्टि भएको जानकारी दिनुभयो । साथै घटनाबारे थप जानकारी आउन बाँकी रहेको पनि उहाँले बताउनुभयो ।
यता आफन्तले चौलागाई विद्युतका कर्मचारीसँग काम गर्दै आएको बताएका छन् । तर कालीकोट वितरण केन्द्रका कर्मचारी मुना बमले भने आफ्नो कर्मचारी नभएको र के कसरी पोलमा गए त्यसका बारे फिल्डमा रहेका कर्मचारीसँग जानकारी हुने बताउनुभयो ।
