बोमलाल गिरी
नवलपुर, कात्तिक २८ गते । नवलपुर प्रहरीले अवैध रुपमा ल्याउँदै गरेको १६ लाख मूल्य बराबरको केराउ बरामद गरेको छ । पूर्व–पश्चिम राजमार्गअन्तर्गत नवलपुरको कावासोती –१६ चालिस किलो जङ्गलमा चेकजाँच गर्ने क्रममा १६ लाख ११ हजार ३६० रुपियाँ बराबरको १२ हजार चारसय ८० किलो अवैध केराउ बरामद गरेको जिल्ला प्रहरी कार्यालयका प्रहरी नायब उपरीक्षक जेसी शाहले जानकारी दिनुभयो ।
प्रहरीले पश्चिमबाट पूर्वतर्फ आउँदै गरेको लु २ ख ६९९३ को ट्रक र चालक नवलपरासी सुस्ता गाउँपालिका –३ का २६ वर्षीय तेजनारायण गुराउलाई नियन्त्रणमा लिएको जनाएको छ ।
भारतबाट भन्सार छली ल्याएको केराउ कस्को हो र कहाँ लैजान लागिएको हो भन्ने नखुलेको र यस बारेमा अनुसन्धान भइरहेको शाहले बताउनुभयो । बरामद गरिएको केराउ आवश्यक कार्वाहीका लागि भन्सार कार्यालय त्रिवेणी पठाइएको जिल्ला प्रहरी कार्यालयले जनाएको छ ।
