बोमलाल गिरी
नवलपुर, कात्तिक २० गते। नवलपुरमा गैँडाको आक्रमणबाट एक जनाको मृत्यु भएको छ। गैँडाको आक्रमणबाट कावासोती नगरपालिका वडा नं. ७ बोटे टोलका ६५ वर्षीय सुकबहादुर बोटेको मृत्यु भएको जिल्ला प्रहरी कार्यालयका प्रहरी नायब उपरीक्षक जेसी शाहले जानकारी दिनुभयो।
मङ्गलबार दिउँसो पौने एक बजेको समयमा कावासोती ७ कै कृष्णसार सामुदायिक वनमा गाईगोरु चराउन गएको बेला गैँडाले बोटेलाई आक्रमण गरेर घाइते बनाएको शाहले जानकारी दिनुभयो।
गैँडाको आक्रमणबाट छातीमा चोट लागि गम्भीर घाइते भएका बोटेलाई उपचारका लागि कालिगण्डकी अस्पताल लगिएको थियो। उहाँको उपचारका क्रममा मृत्यु भएको प्रहरीले जनाएको छ।
