आकाशको जून टिपी दिन्छु भन्न जान्दिनँ म
स्वतन्त्र छ माया मेरो कसमले बान्दिनँ म ।
आज कुरा लुकाएर भोलि खोल्नै पर्ने हुन्छ
सत्य साँचो बोलिदिन्छु कुरा अड्काई छान्दिनँ म ।
देखासिकी गर्नु पर्छ माया प्रेममा भन्छौ भने
व्यवहारमा जिउनु पर्छ सिद्धान्तलाई मान्दिनँ म ।
कस्ती रै’छ मान्छे भनी नजर जुदाउँदै छौ
मृगतृष्णा नजरले कसैलाई नि हान्दिनँ म ।
यही कुरा सुन बुझ अरु भन्नु छैन बाँकी
मन नपरे जता जाऊ हात समाई तान्दिनँ म ।
