काठमाडौँ भदौ ६ गते । प्रेस काउन्सिल नेपालले प्रेस सङ्ग्रहालयका निम्ति सञ्चारसम्बद्ध पुराना सामग्री उपलब्ध गराउन सार्वजनिक अपिल गरेको छ । बिहीबार एक अपिल जारी गर्दै काउन्सिले ३ वर्षअघि सुरु गरेको प्रेस सङ्ग्रहालयका लागि सञ्चारसम्बद्ध ऐतिहासिक सामग्री उपलब्ध गराउन विभिन्न सञ्चार माध्यम, सञ्चार गृह, पत्रकार, विश्वविद्यालय, सङ्घसंस्था, व्यक्ति, सरकारी तथा गैर सरकारी निकायहरूलाई अपिल गरेको हो ।
काउन्सिलले सङ्ग्रहालयमा सामग्री उपलब्ध गराउन सरोकारवालालाई पुनः पत्राचार गर्ने निर्णयसमेत गरेको छ ।
तीन वर्षअघिदेखि काउन्सिल परिसरमा सङ्ग्रहालय स्थापना गरी ट्रेडल मेसिन, कटिङ मेसिन (म्यानुअल), केस नेपाली र अङ्ग्रेजी (फन्टसहित रूलरसहितको प्रुफ मेसिन), विभिन्न आकारका चिम्टा, स्टिक, विभिन्न आकारका रुलरहरू, हेडिङ ब्लक फोटासहित, जिङ्क ब्लक (पुराना फोटासहित), ग्यालीहरू, फ्रेम–साँचो–सेटधागो, हाते टाइपराइटर र फ्याक्स मेसिन, पुराना कम्प्युटर मनिटर सङ्गृहीत गरेर राखिएको छ ।
काउन्सिलले स्थापना गरेको यो सङ्ग्रहालय विश्व प्रेस इतिहासमा नै पहिलो र उदाहरणीय हो । यसबाट प्रेसको इतिहास अध्ययन र अनुसन्धानका लागि टेवा पुग्ने अपेक्षा काउन्सिलको छ ।
‘वर्तमान तथा भावी पुस्तालाई प्रेससँग सम्बन्धित पुराना सामग्रीहरूका बारेमा जानकारी गराउँदै विभिन्न कालखण्डमा विकास एवं प्रयोगमा आएका ऐतिहासिक महत्वका छापाखाना सहित सामग्रीहरू सङ्ग्रहित गरी सोको जगेर्ना गर्नुका साथै प्रेसको इतिहास अध्ययन अनुसन्धानको थलोको रूपमा विकास गर्नु प्रेस सङ्ग्रहालयको मुख्य ध्येय हो ।’ काउन्सिलका वरिष्ठ प्रशासकीय अधिकृत एवं प्रवक्ता दीपक खनालद्वारा जारी अपिलमा भनिएको छ । काउन्सिलले सङ्ग्रहालयका लागि छुट्टै सब–डोमेन वेबसाइटसमेत सञ्चालनमा ल्याएको छ ।
