यो देश कहाँ पाऊँला (कविता)

घामको चुल्ठो बाटेर

चन्द्रमा शिरफूल लाऊँला

खोजेर सारा धरतीमा 

यो देश कहाँ पाऊँला 

पुर्खाको नासो सम्झेर

मायाले छातीमा टाँसेर

तिम्रो र मेरो रगतले

साइनोको नाता गाँसेर

वनफूलको कुरा धेरै भो

मनफूलको डाली फुलाऔँ 

सेताम्मे हिउँ सिँचेर

फाँटमा बाली झुलाऔँ 

जुरुक्क उठेर पाखुरी

समृद्धि छरौँ सर्वत्र

बैरीका सामु जुटेर

देखाऊँ आफ्नो बर्कत

हाँसेका दन्त लहर

देशको नक्सा भै खुलोस्

डाँफे र मुजुर नबिसौँ

सर्वत्र नेपाली मन डुलोस् ।