साधन घर्ती
म्याग्दी (दरबाङ),साउन ४ गते । मुस्ताङमा नाली खन्ने क्रममा माटोको ढिस्कोले पुरिएर दुई जना मजदुरको मृत्यु भएको छ । शुक्रबार दिउँसो घरपझोङ गाउँपालिका–५, ढुम्बास्थित कुछप तेरङ्गा गुम्बा परिसरमा नाली खन्ने क्रममा अचानक माथिबाट माटो खसेको हो ।
माटोको ढिस्कोले पुरिँदा सर्लाही लालबन्दी नगरपालिका-१५, का अन्दाजी २३ वर्षीय होमबहादुर बुढाथोकी र दाङ गढवा गाउँपालिका-१,का अन्दाजी २३ वर्षीय रवि दर्लामी मगरको घटनास्थलमै मृत्यु भएको जिल्ला प्रहरी कार्यालय मुस्ताङका प्रहरी नायब उपरीक्षक भोजराज पाण्डेयले जानकारी दिनुभयो ।
दिउँसो करिब १ बजेको समयमा माटोको ढिस्को खसेर मजदुर पुरिएको खबर प्राप्त भएसँगै जिल्ला प्रहरी कार्यालय मुस्ताङका प्रनाउ पाण्डेयको नेतृत्वमा प्रहरी टोलीसहित जोमसामस्थित नारायण दल गणबाट नेपाली सेना र सशस्त्र प्रहरी बल ३३ नम्बर गुल्मबाट सशस्त्र प्रहरीको संयुक्त टोली घटनास्थलमा पुगेको थियो ।
डोजर प्रयोग गरी ढिस्को पन्छाएर दुई जनाको शव बाहिर निकालिएको छ । घटनास्थलको मुचुल्का तयार पारी शव पोष्टमार्टमका लागि जिल्ला अस्पताल पठाइएको प्रनाउ पाण्डेयले बताउनुभयो ।
