बागलुङ नगरपालिकामा गठबन्धन विजयी
बागलुङ नगरपालिकाको प्रमुख र उपप्रमुख दुवै पदमा पाँच दलिय गठबन्धनका साझा उम्मेदवार विजयी भएका छन् ।
पोखरामा गणना ढिलो भएपछि मतगणनास्थल थप
स्थानीय तह सदस्य निर्वाचन–२०७९ अन्तर्गत कास्कीका पाँच पालिकामध्ये चार गाउँपालिकाको अन्तिम नतिजा सार्वजनिक भएको छ । मादी, रुपा, अन्नपूर्ण र माछापुच्छ्रे गाउँपालिकाको परिणाम सार्वजनिक भइसक्दा पनि पोखरा महानगरको गणना जारी छ ।
नपा र गापाको परिणाम आउँदै,पोखरा महानगरको मतगणनामा ढिलाइ
पोखरा महानगरपालिकाको मतगणना शनिबारदेखि निरन्तर चलिरहेको छ । यहाँका ३३ वडामध्ये अहिलेसम्म सातवटा वडाको अन्तिम परिणाम आइसकेको छ । पोखरामा एक लाख ४३ हजार २१३ मत खसेको थियो । अहिलेसम्म २३ हजार हाराहारी मतगणना भएको छ ।
तानसेनको प्रमुखमा काँग्रेस र उपप्रमुखमा माओवादी उम्मेदवार विजयी
रेखीराम रानापाल्पा, जेठ ३ गते । पाल्पाको सदरमुकाम तानसेनमा गठबन्धनका उम्मेदवार विजयी भएका छन् । गठबन्धनको तर्फबट तानसेन नगरपालिकाकोे प्रमुखमा सन्तोषलाल श्रेष्ठ र उपप्रमुखमा प्रतिक्षा सिंजाली विजयी हुनुभएको हो । श्रेष्ठले ११ हजार २ सय ७३ र सिंजालीले ११ हजार १ सय ५१ मत ल्याएर विजयी हुनुभएको हो । एमालेबाट नगर प्रमुखको उम्मेदवार बन्नुभएका धनेन्द्रराज घिमिरेले १० हजार ३ सय ९४ र उपप्रमुखका उम्मेदवार शशी श्रेष्ठले १० हजार १ सय ५१ मत ल्याउनुभएको छ । तानसेनमा नेपाली काङ्ग्रेसले वडा नं. १, २, ३, ४, ६, ७, ११ र १२ वडामा जितेको छ । यस्तै माओवादीका उम्मेदवारले तानसेनको वडा नं. ५ र १३ वडा जितेको छ । एमालेले भने वडा नं. ८, ९, १० र १४ जितेको छ । बैशाख ३० गते रातिदेखि सुरु भएको मतगणनाको काम मङ्गलबार बेलुकी मात्रै सकिएको मुख्य निर्वाचन अधिकृतको कार्यालयले जनाएको छ ।
घिरिङ गाउँपालिकाको अध्यक्ष र उपाध्यक्षमा एमाले विजयी
अमरराज नहर्की तनहुँ, जेठ ३ गते । तनहुँको घिरिङ गाउँपालिकाको अध्यक्ष तथा उपाध्यक्ष दुवै नेकपा (एमाले) ले जितेको छ । गठबन्धनका उम्मेदवारलाई पराजित गर्दै अध्यक्ष र उपाध्यक्ष दुवैमा एमालेले जित हासिल गरेको हो । एमालेका होमबहादुर थापाले ७९७ मतान्तरणले नेपाली काँग्रेसका गङ्गा कुमाललाई पराजित गर्नुभयो । थापाले चार हजार ३३१ मत प्राप्त गर्नुभयो भने कुमालले तीन हजार ५५४ मत प्राप्त गर्नुभएको छ । उपाध्यक्षमा एमालेकै राधादेवी अधिकारी चार हजार चारसय ८१ मत प्राप्त गरी विजयी हुनुभएको छ । काङग्रेस र एकीकृत समाजवादीको गठबन्धनका तर्फबाट उपाध्यक्षका उम्मेदवार पूर्णबहादुर थापाले दुई हजार सातसय ४७ मत प्राप्त गर्नुभएको थियो । घिरिङ गाउँपालिकाको ५ वटा वडामध्ये तीन वटामा एमाले र दुई वटामा काँग्रेसले विजय हासिल गरेको छ । काँग्रेसबाट १ को वडाध्यक्षमा रविचन्द्र घोरासिनी र ५ को अध्यक्षमा विष्णुवीर आले विजय हासिल गर्नुभएको छ । एमालेबाट २ को वडाध्यक्षमा नरबहादुर थापा, ३ को वडाध्यक्षमा तहलसिं थापा र ४ को वडाध्यक्षमा भिमबहादुर कुमालले विजय हासिल गर्नुभएको छ । यसअघि २०७४ को स्थानीय तहमा पनि एमालेले अध्यक्ष र उपाध्यक्ष दुवै पद जितेको थियो ।
भिमाद नगरपालिका प्रमुख तथा उपप्रमुखमा एमाले विजयी
अमरराज नहर्की तनहुँ, जेठ ३ गते । नेपाली काँग्रेस र नेकपा (एकीकृत समाजबादी) को गठबन्धनलाई पाराजित गर्दै भिमादमा नगरपालिका प्रमुख तथा उपप्रमुख दुवै पदमा एमालेले जित हासिल गरेको छ । सो नगरपालिकाको प्रमुखमा दधिराज सुवेदी ८ हजार १२८ मत प्राप्त गरी विजयी हुनुभयो । सुवेदीका प्रतिस्पर्धी गठबन्धनका तर्फबाट एकीकृत समाजवादीका काजीमान श्रेष्ठले ५ हजार ८५७ मत पाउनुभयो । यस्तै, उपप्रमुखमा एमालेकै शारदा खनाल ७ हजार ६६७ मत प्राप्त गरी विजयी हुनुभयो । खनाल यसअघि पनि यस नगरपालिकाको उपप्रमुख हुनुहुन्थ्यो । खनालको प्रतिस्पर्धी गठबन्धनका तर्फबाट नेपाली काङ्ग्रेसका मिलन आलेले ७ हजार २०५ मत पाउनुभयो । भिमाद नगरपालिकाको वडा २, ३, ७, ८ र ९ वडा एमालेले जितेको छ । नेपाली काँग्र्रेसले भिमाद–१, ४, ५, ६ जितेको छ । तनहुँको कूल जम्मा २४ हजार ८८४ मतदाता रहेको भिमाद नगरपालिकामा १६ हजार १४९ मत खसेको थियो । भिमादमा काँग्रेस, नेकपा एकीकृत समाजवादीबीच चुनावी तालमेल भएको थियो । काँगेसले उपप्रमुख र समाजवादीले प्रमुख पदमा उम्मेदवारी दिएको थियो । भिमाद नगरपालिका यसअघिको २०७४ को स्थानीय तहको निर्वाचनमा पनि प्रमुख तथा उपप्रमुख दुवै एमालेले जितेको थियो ।
म्याग्दीमा ४५ मध्ये ४० वडाको परिणाम सार्वजनिक
म्याग्दीमा स्थानीय तह निर्वाचनको मतदानपछि भएको मतगणनामा हालसम्म ४५ मध्ये ४० वडाको मतपरिणाम सार्वजनिक भएको छ ।
-original-thumb.jpg)
बेंसीशहर नगरपालिकामा एमालेका अर्याल र गुरुङ निर्वाचित
बेलिना थापालमजुङ, जेठ ३ गते । लमजुङको बेंसीशहर नगरपालिकाको प्रमुखमा नेकपा (एमाले) का गुमानसिङ अर्याल निर्वाचित हुनुभएको छ । उपप्रमुखमा एमालेकै पदमा गुरुङ निर्वाचित हुनुभएको छ ।प्रमुख पदमा उम्मेदवार अर्यालले ९ हजार ४ सय ७९ मत ल्याएर पुनः ५ बर्षका लागि प्रमुखमा निर्वाचित हुनुभएको हो । उहाँ यसअघि पनि प्रमुख हुनुहुन्थ्यो । उहाँको प्रतिद्वन्दी नेपाली काँग्रेसका श्रीकान्त घिमिरेले ७ हजार ४ सय ७१ मत ल्याउनुभएको छ । प्रतिद्वन्द्वी राप्रपाका अजितबहादुर अधिकारीले १ सय ४६ मत, मङ्गोल नेशनल अर्गनाइजेसनका कुलुकुमारी गुरुङले ५३ र जसपाका बलहादुर रानाले ४३ मत ल्याउनुभएको छ ।यस्तै उपप्रमुखमा एमालेकी पदमा गुरुङले ८ हजार ७ सय १४ मत ल्याएर विजयी हुनुभएको छ । प्रतिद्वन्द्वी नेकपा माओवादी केन्द्रका हरिजङ तामाङले ४ हजार ६ सय ९९ मत ल्याउनुभएको छ । स्वतन्त्र उम्मेदवार जीवनकुमार श्रेष्ठले १ हजार ६ सय १५ मत, राप्रपाका मेनुका कार्कीले १ सय ४८ मत र मङ्गोल नेशनल अर्गनाइजेसनका पदममाया गुरुङ्ले ४८ मत ल्याउनुभएको छ । यसअघि अर्यालले नेपाली काँग्रेसका भेषबहादुर पौडेललाई हराएर प्रमुख जित्नुभएको थियो ।
मुसिकोट नगरमा एमालेका खरेल र श्रेष्ठ विजयी
गुल्मीको मुसिकोट नगरपालिकामा नेकपा एमालेका जीवन खरेल ७ हजार ३९९ मत ल्याएर विजयी हुनुभएको छ । उहाँका प्रतिद्वन्द्वी नेपाली कांग्रेसका हरीनारायण सापकोटाले ६ हजार ६०६ मत प्राप्त गर्नुभएको छ ।
बेनी नगरपालिकामा मेयरमा एमाले र उपमेयरमा गठबन्धन विजयी
हिमाली जिल्ला म्याग्दीको बेनी नगरपालिकाको मेयर पदमा सत्ता गठबन्धनका तर्फबाट नेपाली कांग्रेसका उम्मेदवार चिरञ्जीवि शर्मालाई पराजित गर्दै नेकपा एमालेका सुरत केसी विजयी हुनुभएको छ । के.सी.ले ७ हजार ६०३ मत ल्याएर विजयी हुनुभएको हो । उहाँका निकटतम प्रतिस्पर्धी नेपाली कांग्रेसका शर्माले ६ हजार २३० मत पाउनुभएको छ ।
गोरखामा माओवादी केन्द्रले जित्यो ४ वटा पालिका
नेकपा माओवादी केन्द्रले जिल्लाका ४ स्थानीय तहमा विजय हासिल गरेको छ । सोमबार सार्वजनिक भएको नजिताअनुसार बारपाक सुलिकोट, शहीद लखन र भीमसेनमा माओवादी विजयी भएको हो । यसअघि अजिरकोटमा आइतबार नै जितिसकेको छ । नेपाली काँग्रेस अहिलेसम्म आरुघाटमा मात्र विजयी भएको छ ।
ढोरपाटन नगरपालिका प्रमुखमा एमाले र उपप्रमुखमा काँग्रेस विजयी
बागलुङको ढोरपाटन नगरपालिका प्रमुखमा दोस्रो पटक नेकपा एमालेका उम्मेदवार देवकुमार नेपाली निर्वाचित हुनुभएको छ । गठबन्धनका साझा उम्मेदवार माओवादी केन्द्रका चन्द्र अर्याललाई ६ सय मत अन्तरले पराजित गर्दै पुनः नगरपालिका प्रमुखमा निर्वाचित हुनुभएको हो ।
धवलागिरीको अध्यक्षमा काँग्रेस र उपाध्यक्षमा माओवादी विजयी
म्याग्दीको धवलागिरी गाउँपालिकाको अध्यक्षमा नेपाली काँग्रेस र उपाध्यक्षमा नेकपा माओवादी केन्द्रका उम्मेदवार विजयी भएका छन् । स्थानीय तह चुनावमा धवलागिरीमा नेपाली कांग्रेस र माओवादी केन्द्रले चुनावी तालमेल गरेका थिए ।
हुप्सेकोट गाउँपालिकामा काँग्रेस विजयी
पूर्वी नवलपरासीको हुप्सेकोट गाउँपालिका अध्यक्ष र उपाध्यक्षमा काँग्रेस विजयी भएको छ । ६ वटै वडासहित गाउँपालिका अध्यक्ष र उपाध्यक्ष कांग्रेस विजयी भएको हो । हुप्सेकोट गाउँपालिकाको अध्यक्षमा निर्वाचित लक्ष्मी देवी पाण्डेले ६ हजार ४ सय ५५मत प्राप्त गरि विजयी हुनुभएको छ ।
बेनी नगरको प्रमुखमा सुरज र उपप्रमुखमा ज्योती विजयी
बेनी नगरपालिकाको प्रमुखमा नेकपा एमालेका उम्मेदवार सुरज केसी विजयी हुनुभएको छ । मंगलबार बिहान सम्पन्न मतगणना अनुसार केसीले सात हजार ६ सय ३ मत प्राप्त गरी प्रमुखमा विजयी हुनुभएको हो ।
पोखरा महानगरमा गठबन्धनका उम्मेदवारले अग्रता बढाउँदै
स्थानीय तह सदस्य निर्वाचन २०७९ अन्तर्गत जारी मतगणनामा पोखरा महानगरपालिकामा सत्ता गठबन्धनका उम्मेदवारले अग्रता बढाएका छन् । जारी मतगणनामा १८ हजार १२० मत गणना हुँदा गठबन्धनबाट प्रमुख पदका उम्मेदवार नेकपा (एकीकृत समाजवादी)का धनराज आचार्यले सात हजार ४१४ मत प्राप्त गर्नुभएको छ । त्यसैगरी नेकपा (एमाले)का प्रमुख पदका उम्मेदवार कृष्णबहादुर थापाले छ हजार ५४५ मत प्राप्त गर्नुभएको छ । गठबन्धनका आचार्यले ८६९ मतले अग्रता हासिल गर्नुभएको हो ।
कान्छीमाया महिला वडाध्यक्षमा निर्वाचित
तनहुँको स्थानीय तहमा पहिलो वडाध्यक्षको रुपमा कान्छीमाया तमाङ प्यानलसहित निर्वाचित हुनुभएको छ । भानु नगरपालिका–१ बाट नेपाली कांग्रेसको तर्फबाट उम्मेदवार बन्नुभएको तामाङ निर्वाचित हुनुभएको हो ।
कास्कीको माछापुच्छे पालिकामा काँग्रेसको सफलता
कास्कीको माछापुच्छे गाउँपालिकामा अध्यक्ष र उपाध्यक्ष दुवै पदमा नेपाली काँग्रेस विजयी भएको छ । मतगणनाको अन्तिम नतिजाअनुसार पालिका अध्यक्षमा कांग्रेसका मिनबहादुर गुरुङ र उपाध्यक्षमा सीता अधिकारी विजयी हुनुभएको हो ।
लागूऔषध गाँजासहित एक पक्राउ
तनहुँ प्रहरीले लागूऔषध गाँजासहित एक युवकलाई पक्राउ गरेको छ । पक्राउ पर्नेमा कास्कीको पोखरा महानगरपालिका–३२ बस्ने २३ वर्षका अमन भुजेल रहेका छन् ।
मदाने गाउँपालिकामा कांग्रेसका महेन्द्रबहादुर कुँवर विजयी
तिलाचन पाण्डेतम्घास, जेठ २ गते । जिल्लाको मदाने गाउँपालिकामा कांग्रेस–माओवादी गठबन्धनबाट कांग्रेसका महेन्द्रबहादुर कुँवर विजयी हुनुभएको छ । उहाँले ४ हजार ७०७ मत प्राप्त गरेर विजयी हुनुभएको हो । उहाँका प्रतिद्वन्दी नेकपा एमालेका प्रेम केशीले ४ हजार २११ मत ल्याउनुभएको हो ।यस्तै, उपाध्यक्षमा नेकपा एमालेकी सरिता खड्का विजयी हुनुभएको छ । उहाँले ४ हजार ५६७ मत ल्याएर विजयी हुनुभएको हो । उहाँका प्रतिद्वन्द्वी गठबन्धनबाट माओवादी केन्द्रका बेगमबहादुर चन्दले ४ हजार २११ मत ल्याउनुभएको हो । उपाध्यक्ष सरिता खड्का यस अगाडी पनि उपाध्यक्ष नै हुनुहुन्थ्यो ।
काभ्रेका २० वडामा काँग्रेसका उम्मेदवार विजयी
स्थानीय तह निर्वाचनअन्तर्गत जिल्लाका १२ वटा स्थानीय तहमा मतगणना कार्य भइरहेको छ । सोमबार मध्याह्न साढे १२ बजेसम्म जिल्लाको १२ वटा स्थानीय तहका ४४ वटा वडाको नतिजा सार्वजनिक भएको छ ।
तनहुँको भानु–१३ मा वडाध्यक्षमा बागी उम्मेदवार अधिकारी विजयी
तनहुँको भानु नगरपालिका–१३ को वडाध्यक्षमा नेपाली कांग्रेसका बागी उम्मेदवार कृष्णबहादुर अधिकारी विजयी हुनुभएको छ ।
म्याग्दीको मंगलामा एमालेका उम्मेदवार विजयी
अमृतप्रसाद पौडेलम्याग्दी, जेठ २ गते । स्थानीय तह निर्वाचन–२०७९ अन्तर्गत सोमबार बिहान सम्पन्न मतगणनाको घोषित अन्तिम मत परिणामअनुसार पश्चिम म्याग्दीको मंगला गाउँपालिकामा नेकपा (एमाले) विजयी भएको छ । यसअघि आइतबार घोषणा भएको परिणामअनुसार मालिका गाउँपालिकामा पनि एमालेले अध्यक्ष उपाध्यक्ष जितेको थियो ।मंगला गाउँपालिकाको अध्यक्षमा एमाले उम्मेदवार सतप्रसाद रोकाले ३ हजार ९ सय ६८ मत ल्याएर बिजयी हुँदै गर्दा उहाँका निकटतम प्रतिस्पर्धी नेपाली कांग्रेसका वीरेन्द्र बुढाथोकीले २ हजार ८ सय ५ मत पाउनुभएको छ । अध्यक्षका अर्का प्रतिस्पर्धी नेकपा माओवादी केन्द्रका टेकबहादुर विकले १ हजार ५ सय २१ मत पाउनुभयो । अध्यक्षमा निर्वाचित एमाले उम्मेदवार रोका मंगला गाउँपालिकाको दोस्रो कार्यकालका लागि बिजयी हुनुभएको हो । त्यस्तै उपाध्यक्षमा पनि नेकपा एमालेकै उम्मेदवार प्रेमकुमारी क्षत्रीले ४ हजार २ सय ६१ मतसहित विजयी हुनुभएको मंगला गाउँपालिका निर्वाचन कार्यालयका सहायक निर्वाचन अधिकृत मनोहर ढुङ्गानाले बताउनुभयो । उपाध्यक्षमा विजयी क्षत्रीका निकटतम प्रतिस्पर्धी नेपाली कांग्रेसकी शर्मिला थापाले २ हजार ५ सय ९५ र माओवादी केन्द्रकी सुकमाया रोकाले १ हजार ३ सय ७३ मत पाएको सहायक निर्वाचन अधिकृत ढुङ्गानाले जानकारी दिनुभयो । कुल १३ हजार ४ सय १६ मतदाता रहेको मंगलामा ८ हजार ८ सय १७ अर्थात् ६५ दशमलव ७२ प्रतिशत मत खसेको थियो । ५ वटा वडा रहेको मंगलामा निर्वाचित हुने २७ पदका लागि ९८ जना उम्मेदवारले प्रतिस्पर्धा गरेका थिए । मंगला गाउँपालिकाको पाँचवटा वडामध्ये तीनवटा वडामा एमाले र एक एक वडामा माओवादी र कांग्रेसको प्यानलसहित विजयी भएका छन् । मंगला १ कुहुँमा एमाले, २ बाबियाचौरमा एमाले, ३ बराङ्जामा माओवादी, ४ बराङ्जामा कांग्रेस र ५ अर्मनमा एमाले विजयी भएको निर्वाचन अधिकृतको कार्यालयले जनाएको छ । सोमबार बिहानै प्रकाशित निर्वाचनको अन्तिम मत परिणामअनुसार रघुगंगा गाउँपालिकाको अध्यक्ष र उपाध्यक्षमा कांग्रेसका भवबहादुर भण्डारी र प्रेमकुमारी पुन विजयी हुनुभएको छ । आइतबार प्रकाशित मतपरिणाम अनुसार पश्चिम म्याग्दीको मालिका गाउँपालिकामा भने एमालेका वेगप्रसाद गर्बुजा र लक्ष्मीदेवी घर्तीमगर पुन विजयी बन्नुभएको छ । एक नगरपालिका र पाँचवटा गाउँपालिकासहित कुल ४५ वटा वडा रहेको म्याग्दीमा हालसम्म ३३ वडाको मतपरिणाम सार्वजनिक भएको छ । सार्वजनिक मतपरिणामअनुसार एमाले १६ वडा, कांग्रेस १२ र माओवादी ५ वटा वडामा विजयी भएको जिल्ला निर्वाचन कार्यालयले जनाएको छ । म्याग्दीमा अब १२ वटा वडा एवम् धौलागिरी गाउँपालिका, अन्नपुर्ण गाउँपालिका र बेनी नगरपालिकाको प्रमुख उपप्रमुखको मतपरिणाम आउन बाँकी छ ।
बुलिङटारमा अध्यक्षमा एमाले र उपाध्यक्षमा कांग्रेस विजयी
नवलपुरको पहाडी गाउँपालिका बुलिङटारमा नेकपा एमालेले ऐतिहासिक जीत निकालेको छ । नेकपा एमालेको तर्फबाट गाउँपालिका अध्यक्ष पदको उम्मेदवार बन्नु भएका २८ वर्षीय दीपेन्द्र सुनारीमगरले ४०५९ मत प्राप्त गरि विजयी हुनु भएको छ ।
म्याग्दीको रघुगंगामा नेपाली कांग्रेस विजयी
म्याग्दीको रघुगंगा गाउँपालिकाको अध्यक्ष र उपाध्यक्षमा नेपाली कांग्रेसका उम्मेदवार विजयी भएका छन् । नेपाली कांग्रेसका भवबहादुर भण्डारीले चार हजार ३८ मत ल्याएर गाउँपालिका अध्यक्ष र उपाध्यक्षमा कांग्रेसकै प्रेमकुमारी पुनले तीन हजार ३६४ मत ल्याएर निर्वाचित हुनुभएको सहायक निर्वाचन अधिकृत अमृत सुवेदीले जानकारी दिनुभयो ।
