घुर ताप्दा जलेर गम्भीर घाइते राजवंशीको मृत्यु

विष्णुप्रसाद पोखरेल
दमक, फागुन ९ गते । घुर ताप्ने क्रममा जलेर गम्भीर घाइते हुनुभएको झापाको बाह्रदशी गाउँपालिका वडा नं. ५ का ५६ वर्षीया कमला राजवंशीको मृत्यु भएको छ । गत माघ २८ गते घुर ताप्ने क्रममा कमलाको कम्मर मुनि जलेको वडाध्यक्ष बीरबहादुर राजवंशीले जनाउनु भयो ।

वडाध्यक्ष राजवंशीका अनुसार स्थानीयले सहयोग जुटाएर घाइते कमलालाई उपचारका लागि बिर्तामोडको संजिवनी हस्पिटलमा राखिएको थियो । उपचारका क्रममा मङ्गलबार कमलाको मृत्यु भएको हो ।

वडाध्यक्ष राजवंशीले दिनु भएका जानकारी अनुसार कमलाको आफन्त कोही नभएको र उहाँ घरमा एक्लै बस्दै आउनु भएको थियो । उपचारका लागि सुविधा सम्पन्न अस्पतालमा लैजान नसक्दा कमलाको मृत्यु भएकोस्थानीयहरुले बताएका छन् ।