टर्की, फागुन ४ गते । पूर्वी टर्कीको सुनखानीमा पहिरो जानमा जिम्मेवार भएको आशङ्का आठ जनालाई पक्राउ गरिएको छ । एर्जिन्कान प्रान्तको इलिक जिल्लाको सुनखानीको डम्प–लिचिङ क्षेत्रमा मङ्गलबार पहिरो गएको थियो । सो पहिरोमा नौ जना कामदार बेपत्ता भएका छन् ।
सो आरोपमा बुधबार सात र बिहीबार एक गरी आठ जनालाई पक्राउ गरिएको हो । पक्राउ परेका सन्दिग्धहरूमा कम्पनीका व्यवस्थापकीय र प्रशासनिक पदमा रहेका कर्मचारी पनि छन् ।
कोप्लर सुनखानी क्षेत्रमा भूमिगत फसेका मजदुरहरुको खोजी तथा उद्धार कार्य जारी छ । टर्कीका आन्तरिक मन्त्री अली येर्लिकायाले पहिरोमा फसेका कामदारहरू खानीबाट निकालिएको, माटोको ढिस्को समावेश भएको १० मिलियन घनमिटरको आयतनमुनि रहेको र उक्त माटो करिब ८०० मिटर सरेको बताउनुभयो । सिन्ह्वा/न्यूज एजेन्सी नेपाल
