तुलसीपुर, माघ ८ गते । मगर राष्ट्रिय मुक्ति मोर्चा नेपाल लुम्बिनी प्रदेश समितिका उपाध्यक्ष एवम् नेपाल मगर सङ्घ तुलसीपुर नगर समितिका सल्लाहकार धनबहादुर बुढा मगरले आमा पार्वती बुढा मगरको सम्झनामा एक लाख सहयोग गर्नुभएको छ ।
बुढाले भवन निर्माण गर्न नेकपा (माओवादी केन्द्र) तुलसीपुर ५ नम्बर वडा कमिटीलाई पचास हजार र नेपाल मगर सङ्घ तुलसीपुर नगर समितिलाई पचास हजार आर्थिक सहयोग गर्नुभएको हो ।
जनयुद्धको क्रममा क्रान्ति आमा पार्वतीका छोरा समर, छोरी सपना र ज्वाइँ बिजोग सहिद हुनुभएको थियो । बुढा परिवार रुकुमपश्चिम् चौरजहारीबाट तुलसीपुरमा बसाइसराइ गरी आएको हो ।
क्रान्ति आमा पार्वती बुढा मगरको स्मृतिमा माओवादी केन्द्रले आयोजना गरेको श्रद्धाञ्जली कार्यक्रममा छोरा धनबहादुरले सहयोग हस्तान्तरण गर्नुभएको हो । कार्यक्रममा पार्टीका केन्द्रीय सदस्यहरू दामा शर्मा, ओमप्रकाश पुन र भीमकुमारी बुढा मगर, केन्द्रीय सल्लाहकार शेषुराम भण्डारी, प्रदेश सदस्यहरू पुनम सेर्पाइली र प्रेम वली, नेपाल मगर सङ्घ जिल्ला सल्लाहकार टोपबहादुर घर्ती र मगर नेपाल मगर सङ्घ तुलसीपुर नगर अध्यक्षले श्रद्धाञ्जली व्यक्त गर्नुभएको थियो ।
माओवादी केन्द्र तुलसीपुर नगर सदस्य एवम् ५ नम्बर वडा इन्चार्ज मीनराज भण्डारीको अध्यक्षतामा भएको कार्यक्रमको सहजीकरण पार्टीका वडा अध्यक्ष वेदप्रसाद वलीले गर्नु भएको थियो ।
