टीकापुर (कैलाली), पुस ५ गते । टीकापुर नगरपालिकाले सहिद, बेपत्ता पारिएका तथा घाइते परिवारलाई स्वास्थ्य बिमा गरिदिने गरेको छ । पालिकाले गत वर्ष ४६ परिवारको बिमा गरिदिएको थियो ।
बिमा कार्यक्रमबाट धेरै परिवारले उपचारमा सुविधा भएको बताएका छन् । बेपत्ता परिवारका सदस्य दुर्गाकुमारी जैसी रिमालले नगरपालिकाले बिमा गरिदिएपछि गत वर्ष ५० हजार बढीको स्वास्थ्य उपचार सेवा लिनुभयो । उहाँले टीकापुर अस्पतालमात्र नभई काठमाडौँको वीर अस्पतालमा समेत सेवा लिनुभयो ।
बिमाले उपचार सेवा लिन सहज भएको उहाँ बताउनुहुन्छ । “म बेपत्ता परिवारको सदस्य हो । हामीजस्ता उपचार गर्न बजेट जुटाउन नसक्ने परिवारलाई पालिकाले बिमा गरिदिएर ठुलो सहयोग गरेको छ”, दुर्गाले भन्नुभयो, “गत वर्ष मैले बिमा सुविधाबाट टीकापुर अस्पताल, नेपालगन्ज र काठमाडौँको वीर अस्पतालमा उपचार सुविधा लिएँ ।” स्थानीय पालिकाले सानो सहयोगबाट बिमा गरिदिएर आफूहरूलाई ठुलो सहयोग मिलेको दुर्गाकुमारीले बताउनुभयो ।
टीकापुर नगरपालिका-३ की बिना थारुको टीकापुर नगरपालिकाले स्वास्थ्य बिमा गरिदिएको छ । सशस्त्र द्वन्द्वमा घाइते परिवारका सदस्य बिनाको परिवारले गत वर्ष बिमा बापत टीकापुर अस्पतालबाट ३० हजार बराबरको औषधि सुविधा लियो । बिरामी भएको अवस्थामा पालिकाले गरिदिएको बिमाले उनीहरूलाई सहज भयो ।
“सहिद, घाइते तथा अपाङ्ग परिवारको अवस्था त्यसै पनि दयनीय छ । विपन्नलाई उपचारमा सहज होस् भनी पालिकाले राम्रो सुरुआत गरेको छ । गत वर्ष पनि सुविधा लिएँ । यस वर्ष पनि नवीकरण गरिदिएको छ”, उहाँ भन्नुहुन्छ, “बिमा भएपछि २४ सैँ घण्टा चिकित्सकको सेवा पाइने, यहाँ नभए अन्त पनि उपचार हुने भएकाले यसबाट धेरैले लाभ लिएका छन् ।” पालिकाले गत वर्षदेखि विभिन्न आन्दोलनमा सहिद, बेपत्ता पारिएका तथा घाइते परिवारलाई स्वास्थ्य बिमा गरिदिने गरेको हो ।
पालिकाले कार्यविधि बनाएर बिमा सुविधा दिने गरेको हो । गत वर्ष ४६ परिवारको स्वास्थ्य बिमा गरिदिएको थियो । जसमा दुई लाख पालिकाको खर्च भएको थियो । प्रतिपरिवार पाँच जनाका लागि बिमा शुल्क तीन हजार पाँच सय तिर्नुपर्छ । यति रकम बराबर उपचार गर्दा एक लाखसम्मको सेवा निः शुल्क पाइन्छ । यो कार्यक्रमले बिमामा आबद्ध परिवारलाई उपचारमा सहजता भएकाले खुसी भएका जनस्वास्थ्य प्रवर्द्धन उपशाखा प्रमुख बलबहादुर रावल बताउनुहुन्छ ।
“गत वर्ष बिमामा आबद्ध भएका धेरै परिवारले टीकापुर अस्पताल र यहाँबाट रेफर भएर पनि सेवा लिनुभएको छ”, रावल भन्नुहुन्छ, “पालिकाले आर्थिक सहायता गर्नुभन्दा बिमा गरिदिएमा परिवारले नै राहत पाउँछ ।” स्वास्थ्य शाखा प्रमुख रावल बिमा गरिदिँदा सबै परिवारले उपचार सेवा पाउने भएकाले सहज हुने बताउनुहुन्छ ।
“यस वर्ष पनि हामीले बिमामा आबद्ध हुन सूचना गरिसकेको छौँ, गत वर्ष केही कागजात नपुगेका आबद्ध हुन सकेका थिएनन्,” उहाँ भन्नुहुन्छ, “गत वर्ष सूचना नपाएका तथा छुटेका पनि यस वर्ष सेवामा जोडिने छन् ।” स्वास्थ्य बिमामार्फत उपचार सहजताका लागि पालिकाले बिमा कार्यक्रमलाई थप प्रभावकारी बनाउन सघाउन आवश्यक रहेको स्थानीय बताउँछन् । रासस
