अँध्यारो (गीत)

अँध्यारोमा फुलेँ, अँध्यारोमा ओइलिएँ

जीवनको यथार्थ अँध्यारोमै पाएँ !

रहस्य लुकेका अँध्यारोमा धेरै 

त्यही देख्न खोज्ने चाहना छ मेरै !

म के हुँ कहाँ छु देखून् सबैले

तर सब गएछन् अँध्यारोमा खेरै !

अँध्यारोमै छोपिन्छ पापको राप

तर भित्र भित्रै राकिन्छ ताप !

जलन त्यो अघोर दुःखी छटपटाई

उज्यालोमा प्रस्टिन्छ ननिको गराइ !

जन्मदा म आँखा नखोलेरै रोएँ

अवसानमा आँखा नखोलेरै गएँ !

उज्यालोको आशा सदैव गरेर 

तर बित्छ जीवन अँध्यारो भएर  !

कसैको जीवनमा किन रातै रात

न दिनको उज्यालो न कसैको साथ ! 

लहरा धरामा खोज्छ सहारा

कालो चाँदरले छोपिदिन्छ सारा !

आँखा छ मेरो भनी पर्छु दङ्ग

किन गर्छु दम्भ किन छ घमण्ड !

अँध्यारोमा केही देख्न सकिन्न 

व्यर्थैमा गर्छु मिथ्याको गर्व  !! 

चण्डोल