होमराज रानाभाट
देवचुुली, साउन २९ गते । गत पुस ३० गते विघटन भएको देवचुुलीस्थित देवचुुली माध्यमिक विद्यालयमा व्यवस्थापन समिति आठ महिना बितिसक्दा पनि नयाँ समिति बन्न नसक्दा शिक्षकले अहिलेसम्म तलबभता नपाएका कारण विद्यालय अस्तव्यस्त बन्न पुुगेको छ ।
नवलपरासी पूर्वको देवचुली नगरपालिका रहजरमा रहेको देवचुली माध्यमिक विद्यालयमा पटक–पटक व्यवस्थापन समिति निर्माणका लागि छलफल र बैठक भए पनि राजनीतिक दाउपेचका कारण जिल्लामा सर्वोत्कृष्ट रहेको सो विद्यालय अहिले भने ओरालो लाग्न थालेको भन्दै स्थानीय अभिभावकले चिन्ता व्यक्त गरेको समाजसेवी पबिन्दै जिसीले बताउनुुभयो ।
यो सामुुदायिक विद्यालय जिल्लामै उत्कृष्ट विद्यालयका रुपमा परिचित छ तर अहिले एउटा व्यवस्थापन समिति गठनमा एमाले कांग्रेस र माओवादीको त्रिपक्षीय विवादले समिति गठन नहुुँदा यहाँका शिक्षकले छ महिनादेखि तलब पाएका छैनन् भने विद्यालयको आर्थिक प्रशासन ठप्प रहेको पूर्व अध्यक्ष सूर्य न्यौपानेले जानकारी दिनुभयो ।
विद्यालय व्यवस्थापन समिति गठन नहुँदा त्यसको प्रत्यक्ष मारमा विद्यालयमा अध्यापनरत शिक्षकहरु परेका शिक्षकहरुले गुुनासो गरेका छन् । विद्यालयका लेखापाल स्थायी शिक्षकमा नाम निकालेर अन्यत्र सरुवा भएपछि विद्यालयको आर्थिक गतिविधि नै अहिले ठप्प छ ।
लेखापाल र प्रधानाध्यापकको हस्ताक्षरबाट निकासा हुने तलबलगायत रकम लेखापाल नहुँदा शिक्षकहरुले समेत पाएका छैनन् । लेखापाल नियुक्तिका लागि समितिले निर्णय गरी आवेदन आह्वान गर्नुपर्ने हुन्छ । तर विद्यालयमा समिति निर्माणमा राजनीतिक स्वार्थ राखी दाउपेच गरेपछी विगत आठ महिनादेखि विद्यालय समितिविहीन छ । विद्यालयमा कार्यरत शिक्षकहरुले विगत छ महिनादेखि तलब पाएका छैनन् ।
तलब नपाएर पीडित बनेका शिक्षकहरुले प्रधानाध्यापकको कार्यकक्षमा तालाबन्दी गरेका छन् । प्रधानाध्यापक नारायणप्रसाद भण्डारीले समिति निर्माणका लागि हदैसम्मको प्रयास गर्दा पनि सफल नभएको बताउनुुभयो । प्रधानाध्यापक भण्डारीले देवचुली नगरपालिकाको शिक्षा शाखाले समिति निर्माणलाई पूर्णता नदिने हो भने आफूले राजीनामा गर्ने बताउनुुभयो ।
