लीलाराज खड्का
बिर्तामोड, असार २५ गते । बिर्तामोड –७ स्थित सुन्दर निचाझोडा सामुदायिक बनबाट चोरी तस्करी गरी लगिएको ६ वटा सखुवाका गोलिया बरामद गरिएको छ ।
आइतवार बिहान साढे ५ बजे बनबाट चोरी गरी बिर्तामोड– ३ स्थित प्रज्वल फर्निचरमा लगिएको अबस्थामा उपभोक्ताहरुले काठ फेला पारी डिभिजन वन कार्यालयलाई खबर गरेको जनाएका छन् ।
मे १ च ३०७९ नम्बरको हात्ती गाडीबाट काठ अनलोड गरिसकेको अबस्थामा बरामद गरिएको उपभोक्ताहरुको भनाइ छ ।
४३.३४ क्युविक फुट काठ बरामद गरी डिभिजन वन कार्यालयमा ल्याइएको र चोरी तस्करीमा संलग्नहरुको खोजी भइरहेको डिभिजन वन कार्यालयका सूचना अधिकारी अन्जना पुरीले जानकारी दिनुभयो ।
सुन्दर निचाझोडा वनमा चोरी तस्करी बढेपछि उपभोक्ताले गस्ती गर्न थालेको वन समितिका अध्यक्ष बद्री प्याकुरेलले जानकारी दिनुभयो ।
