बुटवल समाचारदाता
बुटवल, फागुन २८ गते । रुपन्देहीका उद्योगीले उद्योग व्यवसाय जोगाउन कठिन भएको बताएका छन् । विश्व आर्थिक मन्दीको प्रभाव, बैङ्कको चर्को ब्याज, स्वदेशी उद्योगलाई प्रोत्साहनको अभाव र जग्गा भाडा वृद्धि लगायतका कारण उद्योग बचाउनै चुनौती रहेको बताउनुभएको हो ।
बुटवल औद्योगिक क्षेत्र उद्योग सङ्घको २१औँ वार्षिक साधारण सभा तथा ११औँ अधिवेशनको अवसरमा शुक्रबार बुटवलमा आयोजित कार्यक्रममा नेपाल औद्योगिक क्षेत्र उद्योग महासङ्घका कार्यवाहक अध्यक्ष एजाज आलमले अहिले उद्योगीको अनुहारमा हाँसो हराएको चर्चा गर्दै उद्योग बचाउन चुनौती रहेको बताउनुभयो । उहाँले बुटवल औद्योगिक क्षेत्रभित्र रहेका उद्योग सञ्चालनका लागि व्यवस्थापन लिमिटेडले लिने गरेको भाडा महँगो भएकाले पुनर्विचार गर्न आग्रह गर्नुभयो । कार्यक्रममा रुपन्देही उद्योग सङ्घका अध्यक्ष माधव पौडेलले मुलुकको अर्थतन्त्रको विकासका लागि उत्पादनमूलक क्षेत्रमा राज्यको लगानी हुनुपर्नेमा जोड दिनुभयो । उहाँले स्वदेशी उत्पादनको प्रयोग र संरक्षणमा निजी क्षेत्रको भूमिकालाई सही रूपमा प्रयोग गर्न आग्रह गर्नुभयो ।
सङ्घका पूर्वअध्यक्ष गणेशप्रसाद अधिकारीले पछिल्लो समयमा मुलुकमा देखा परेको आर्थिक मन्दीले उद्योगी धेरै समस्यामा परेको बताउनुभयो ।
कार्यक्रममा सङ्घका अध्यक्ष हीरामणि भट्टराईले आर्थिक मन्दीसँगै बैङ्कको चर्को ब्याजको प्रत्यक्ष असर उद्योग व्यवसायमा परेको धारणा व्यक्त गर्दै पछिल्ला दिनमा बुटवल औद्योगिक क्षेत्रभित्र रहेका उद्योगको उत्पादनमा करिब ५० प्रतिशत कटौती भएको जानकारी दिनुभयो । उहाँले औद्योगिक क्षेत्र सानो हुँदै गएको र उद्योग सञ्चालन गर्न कठिनाइ भएको बताउँदै औद्योगिक क्षेत्र विस्तार गर्न आग्रह गर्नुभयो ।
यसैगरी बुटवल औद्योगिक क्षेत्र उद्योग सङ्घको ११औँ अधिवेशनबाट नयाँ नेतृत्व चयन भएको छ । सङ्घको अध्यक्षमा हीरामणि भट्टराई पुनः सर्वसम्मत निर्वाचित हुनुभएको छ ।
त्यसैगरी सङ्घको उपाध्यक्षमा उपेन्द्र अग्रवाल, महासचिवमा प्रज्वल थान्जु, कोषाध्यक्षमा कमल ज्ञवाली, सचिवमा रामप्रसाद ज्ञवाली तथा सदस्यहरूमा यादवप्रसाद भण्डारी, कौशलराज भण्डारी, सुमन बस्याल र विनोदराज न्यौपाने निर्वाचित हुनुभएको छ ।
