ठाकुरप्रसाद आचार्य
म्याग्दी, माघ ६ गते । आगामी फागुन २१ गते हुने प्रतिनिधि सभा सदस्य निर्वाचनका लागि ६ वटा राजनीतिक दलले मङ्गलबार मनोनयन दर्ताको तयारी गरेका छन् ।
जिल्लामा रहेका नेपाली कांग्रेस, नेपाल कम्युनिष्ट पार्टी(एमाले), नेपाली कम्युनिष्ट पार्टी(नेकपा), विप्लव नेतृत्वको नेपाल कम्युनिष्ट पार्टी(माओवादी), राष्ट्रिय स्वतन्त्र पार्टी(रास्वपा) र राष्ट्रिय प्रजातन्त्र पाटी)(राप्रपा) ले उम्मेदवार टुङ्गो लगाएर मनोनयन दर्ताको तयारी गरेका हुन् ।
कांग्रेसबाट जिल्ला उपसभापति कर्णबहादुर भण्डारी(केबी), एमालेबाट केन्द्रीय सदस्य हरिकृष्ण श्रेष्ठ, नेकपाबाट अर्जुन थापा, रास्वपाबाट युवराज रोका, नेकपा माओवादीबाट पोलिब्युरो सदस्य ध्रुव घिमिरे र राप्रपाबाट डम्बर सुवेदीले मनोनयन दर्ता गराउँदै हुनुहुन्छ ।
उम्मेदवारको मनोनयन दर्ताका लागि राजनीतिक दलहरुलाई मुख्य निर्वाचन अधिकृतको कार्यालयले फरक–फरक समय निर्धारण गरेको छ । मनोनयन दर्ता बिहान ११ बजेदेखि सुरु हुने मुख्य निर्वाचन अधिकृतको कार्यालयले जनाएको ।
प्रतिनिधिसभा सदस्य निर्वाचनका लागि एक निर्वाचन क्षेत्र रहेको जिल्लामा ८६ हजार तीन सय ९७ मतदाता छन् । ४२ हजार तीन सय ३२ जना पुरुष, ४४ हजार ६४ जना महिला र एक जना यौनिक तथा लैङ्गिक अल्पसङ्ख्यक समुदायका मतदाता छन् ।
एक निर्वाचन क्षेत्र रहेको म्याग्दीमा ८२ वटा मतदानस्थल र एक सय १९ वटा मतदान केन्द्र कायम गरिएको छ । जिल्ला निर्वाचन सुरक्षा समितिले भौगोलिक अवस्था र सुरक्षाका हिसाबले १५ वटा अतिसंवेदनशील, ५८ वटा संवेदनशील र ८ वटा मतदानस्थललाई समान्य भनेर वर्गीकरण गरेको छ ।
