जापानका प्रधानमन्त्री मध्यावधि निर्वाचन गर्ने तयारीमा

टोकियो, पुस २६ गते । जापानका प्रधानमन्त्री साने ताकाइचीले जापान सरकारप्रति जनसमर्थन बढाउन आगामी सातामा आम निर्वाचन गराउने विचार गरिरहेकोे शनिबार केही जापानी सञ्चार माध्यमले आफ्नो समाचारमा जनाएका छन् । 

गत अक्टोबरमा जापानको पहिलो महिला प्रधानमन्त्रीमा नियुक्त भएकी ताकाइचीको मन्त्रिपरिषद्ले करिब ७० प्रतिशत अनुमोदन प्राप्त गरेको छ । उहाँको सत्तारूढ समूहसँग संसद्को शक्तिशाली तल्लो सदनमा झिनो बहुमत मात्र छ, जसले उहाँको महत्वाकाङ्क्षी नीति र एजेन्डालाई अगाडि बढाउने क्षमतामा बाधा पुर्याएको छ ।

योमिउरी र माइनिची दैनिक पत्रिकाले नाम नखुलाइएका सरकारी स्रोतलाई उद्धृत गर्दै लेखेका छन्, “उहाँले जनवरी २३ मा संसदको सत्रको सुरुमा तल्लो सदन विघटन गर्ने विचार गरिरहनु भएको छ ।” यसको अर्थ निर्वाचन फेब्रुअरीको सुरूदेखि मध्यसम्म हुने सम्भावना रहेको योमिउरीले जनाएको छ ।

“ताकाइचीको प्रशासनका केही व्यक्तिले ‘आफ्नो जग बलियो बनाउनका लागि समर्थन दर उच्च रहेको बेला संसद् चाँडै विघटन गर्न अघि बढ्नु पर्छ भन्ने धारणा राख्छन्,” माइनिचीले लेखेको छ । ताकाइची सुरुमा अल्पमतको सरकारको प्रमुखको रूपमा जापानको पाँचौ प्रधानमन्त्री बन्नुभएको थियो । 

उहाँको लिबरल डेमोक्र्याटिक पार्टी (एलडीपी) र यसको गठबन्धन साझेदार जापान इनोभेसन पार्टीले नोभेम्बरमा तीन सांसद एलडिपीमा सामेल भएपछि आफ्नो तल्लो सदनको बहुमत पुनः प्राप्त गरेका छन् । माथिल्लो सदनमा सत्तारूढ समूह अल्पमतमा छ । “प्रधानमन्त्री ताकाइचीलाई भारी बहुमतले आफुलाई अधिक ‘सक्रिय’ वित्तीय खर्च र बलियो खुफिया क्षमताको एजेन्डा कार्यान्वयन गर्न मद्दत गर्नेछ,” योमिउरीले लेखेको छ । 

पत्रिकाका अनुसार यसले ताकाइचीलाई चीनसँगको विवादमा गतिरोध तोड्न पनि मद्दत गर्न सक्छ । ताकाइचीले नोभेम्बरमा चीनले ताइवानमा आक्रमण गरेमा जापानले सैन्य हस्तक्षेप गर्न सक्ने सुझाव दिएपछि सम्बन्ध बिग्रिएको छ । बेइजिङले सम्भावित सैन्य क्षेत्रमा प्रयोग हुने र ‘दोहोरो प्रयोग’ हुने सामानको जापानमा निर्यातमा व्यापक प्रतिबन्ध लगाउने घोषणा गरेको छ र कथित रूपमा इलेक्ट्रिक कारदेखि मिसाइलसम्म सबै चीज बनाउनको लागि महत्वपूर्ण दुर्लभ खनिज उत्पादनको निर्यातलाई रोकिरहेको छ । गत महिना ताकाइचीले समस्या फुकाउनका लागि आफू चीनसँग वार्ताका लागि ‘सधैँ खुला’ रहेको बताउनुभएको थियो । रासस/एएफपी