विनय कर्ण
कल्याणपुर (सप्तरी), पुस २६ गते। राष्ट्रिय मुक्ति पार्टीका कार्यकारिणी सदस्य एवं पूर्वमन्त्री चन्द्रकान्त चौधरीको ८५ वर्षको उमेरमा निधन भएको छ। डाक्नेश्वरी नगरपालिका-५, पातो निवासी चौधरीको शनिबार बिहान ११ः३० बजे आफ्नै निवासमा निधन भएको हो।
स्व. चौधरी नेपाली राजनीतिमा अनुभवी तथा सम्मानित नेताका रूपमा परिचित हुनु हुन्थ्यो । उहाँ तत्कालीन राष्ट्रिय जनता पार्टी (राजपा) बाट २०७४ सालको प्रतिनिधिसभा निर्वाचनमा सप्तरी निर्वाचन क्षेत्र ३ बाट निर्वाचित हुनु भएको थियो । प्रतिनिधिसभा सदस्यको हैसियतमा उहाँले जलस्रोत, ऊर्जा तथा सिँचाइ राज्यमन्त्रीको जिम्मेवारी सम्हाल्नु भएको थियो ।
राष्ट्रिय मुक्ति पार्टीका उपमहासचिव गजेन्द्र मण्डलले उहाँको निधनप्रति दुःख व्यक्त गर्दै उहाँको निधनबाट पार्टीलाई अपूरणीय क्षति भएको बताउनु भयो । चौधरी सरल स्वभाव र विकासप्रेमी नेताका रूपमा लोकप्रिय रहनु भएको उहाँको भनाइ छ।
उहाँको निधनप्रति राजनीतिक दलका नेता, कार्यकर्ता तथा सर्वसाधारणले गहिरो दुःख व्यक्त गरेका छन् । स्व. चौधरीका दुई छोरा र एक छोरी छन्। राजनीतिक जीवनको प्रारम्भिक चरणमा उहाँ लामो समयसम्म नेपाली कांग्रेसको राजनीतिमा सक्रिय रहनु भएको र पछि मधेस केन्द्रित राजनीतिमा सक्रिय हुँदै उहाँ तत्कालीन राजपामा प्रवेश गर्नु भएको थियो ।
-original-thumb.jpg)
