प्रनिश गिरी
कुश्मा, (पर्वत) मंसिर १४ गते । पर्वतको मोदी गाउँपालिकास्थित पातीचौरमा निर्माणाधीन चिस्यान केन्द्र ९ वर्षदेखि अलपत्र छ । चिस्यान केन्द्रका लागि राज्यको २० लाखभन्दा बढी रुपियाँ खर्च गरी निर्माण गरिएको पक्की भवन अहिले प्रयोगविहीन छ ।
भवन निर्माणका लागि लाखौं रकम खर्च गरिएको भए पनि वर्षौ वितिसक्दा समेत ५० टन कृषि उत्पादन भण्डारण क्षमता रहेको चिस्यान केन्द्र निर्माणको काम पूरा हुन सकेको छैन । अर्थ मन्त्रालयबाट पातीचौरमा चिस्यान केन्द्र निर्माण गर्ने भनी २०७४ सालमा ५० लाख रकम विनियोजन भएकोमा तत्कालीन जिल्ला विकास समितिमार्फत् रकम प्राप्त गरी भवन निर्माणमा रकम खर्च गरिएको थियो ।
चिस्यान केन्द्र निर्माण सम्पन्न गर्न भनी पटक पटक बजेट विनियोजन हुनेगरेको भए पनि काम हुन सकेको छैन । लाखौं खर्चिएको भवन वर्षौसम्म पनि व्यक्तिकै नामको जग्गामा रहेकोमा गतवर्ष मात्र पालिकाको नाममा आएको वडा २ का अध्यक्ष बेलबहादुर कार्कीको भनाइ छ ।
स्थानीयबासी खेमबहादुर हमालको पातीखोला किनारको पाँच आना क्षेत्रफलको जग्गामा चिस्यान केन्द्रको लागि पक्की भवन निर्माण गरिएको छ । जग्गाधनी हमालसँग चिस्यान केन्द्र निर्माण उपभोक्ता समितिले १३ लाख ५० हजारमा जग्गा खरिदको कागजी सम्झौता गरेको थियो ।
समितिले सम्झौताअनुसारको रकम भुक्तानी गर्न नसकेपछि चिस्यान केन्द्रको नाममा जग्गा नामसारी हुन सकेको थिएन । समितिका अध्यक्ष गंगा तिमिल्सिनाका अनुसार तीन वर्ष पहिले चिस्यान केन्द्र निर्माण गर्न भनी अर्थमन्त्रालयबाट ५५ लाख रकम विनियोजन भएको थियो ।
पालिकाका प्रशासकीय अधिकृत बाबुराम पुरीका अनुसार प्रदेश सरकारबाट यस आर्थिक वर्षमा विशेष अनुदान शीर्षकमा चिस्यान केन्द्रका लागि भनी ४० लाख रकम विजियोजन भएको छ । प्रशासकीय अधिकृत पुरीले थप केही जग्गा व्यक्तिबाट अझै लिनुपर्ने अवस्था रहेको बताउनुभयो ।
मोदी गाउँपालिकाको देउपुर क्षेत्रमा उत्पादित सुन्तला र नजिकैको बनौं, लेस्पार, देउराली, धिवराङ, भुकलगायत स्थानका कृषकहरुले उत्पादन गर्ने आलु भण्डारणका लागि लक्षित गरी पातीचौरमा चिस्यान केन्द्र निर्माण गर्न थालिएको हो ।
स्थानीय देउपुर गाउँबाट मात्र वर्षेनी करोडौ रकम बराबरको सुन्तला उत्पादन हुँदैआएको छ । पातीचौरमा चिस्यान केन्द्र निर्माण गरिदा आलु खेतीका लागि पकेट क्षेत्र मानिने बनौ र लेस्पारका कृषक साथै सुन्तला पकेट क्षेत्र देउपुरका कृषकलाई राम्रो लाभ मिल्ने स्थानीयको भनाइ छ ।
