जीवन बिमा गर्ने सबैभन्दा बढी रूपन्देहीमा

गजेन्द्र गुरुङ

खजुरा, मङ्सिर १४ गते । लुम्बिनी प्रदेशका कुल १२ जिल्लामध्ये जीवन बिमा गर्नेको सबैभन्दा धेरै सङ्ख्या रूपन्देहीमा रहेको छ । त्यसपछि क्रमशः बाँके, दाङ, कपिलवस्तु, नवलपरासी, बर्दिया, पाल्पा, गुल्मी, अर्घाखाँची, प्युठान, रोल्पा र रुकुमपूर्व जिल्ला रहेका छन् ।

नेपाल बिमा प्राधिकरण लुम्बिनी प्रदेश कार्यालयका सहायक निर्देशक शिवराज विसीका अनुसार रूपन्देहीमा सक्रिय बिमालेखको सङ्ख्या ३ लाख ८३ हजार ६२७ रहेको छ । त्यसैगरी बाँकेमा १ लाख ९४ हजार ७४९, दाङमा १ लाख ५४ हजार ४५१, कपिलवस्तुमा ७९ हजार ३९०, नवलपरासीमा ६० हजार ९६९ र बर्दियामा ५९ हजार ७५७ सक्रिय बिमालेख रहेका छन् ।

त्यसैगरी पाल्पामा ५२ हजार ६६०, गुल्मीमा ४३ हजार ३१२, अर्घाखाँचीमा ३४ हजार ८५१, प्युठानमा २१ हजार ३६६, रोल्पामा १२ हजार २१५ र रुकुमपूर्वमा ३ हजार २५६ सक्रिय बिमालेख रहेका सहायक निर्देशक विसीले जानकारी दिनुभयो । लुम्बिनी प्रदेशमा कुल जीवन बिमामा सक्रिय बिमालेखको सङ्ख्या ११ लाख ६०३ रहेको छ । 

उहाँका अनुसार रूपन्देहीमा २ अर्ब ४७ करोड ७६ लाख २४ हजार ३३८, बाँकेमा १ अर्ब २ करोड २३ लाख ७५ हजार १३८, दाङमा १ अर्ब १२ करोड ७६ लाख ७४ हजार १८६, कपिलवस्तुमा ५७ करोड ७५ लाख ६५ हजार ५७२, नवलपरासीमा ५० करोड २४ लाख ६९ हजार ५६७ र बर्दियामा ३२ करोड ८५ लाख ६४ हजार २१४ रुपियाँ जीवन बिमाबापत सङ्कलन भएको छ ।

पाल्पामा ५४ करोड ७० लाख ५८ हजार ९६२, गुल्मीमा २८ करोड ४० लाख ८४ हजार ३१२, अर्घाखाँचीमा २३ करोड ३१ लाख ९२ हजार १७५, प्युठानमा १७ करोड ९२ लाख ९१ हजार ६३३, रोल्पामा ११ करोड ९६ लाख ६४ हजार १२६ र रुकुमपूर्वमा ३ करोड २१ लाख ५७ हजार ३४७ रुपियाँ जीवन बिमाबापत सङ्कलन भएको विसीले जानकारी दिनुभयो । 

उहाँका अनुसार लुम्बिनीमा कुल जीवन बिमाबापत ७ अर्ब ४३ करोड १७ लाख २१ हजार ५७४ रुपियाँ सङ्कलन भएको छ । लुम्बिनीमा कुल जनसङ्ख्याको १९ दशमलव ६३ प्रतिशत नागरिक बिमाको दायरामा आबद्ध भएका छन् । जसमध्ये अधिकांशले जीवन बिमा गरेका छन् । 

मुलुकभरको जीवन बिमामा लुम्बिनी प्रदेशको १४.७६ प्रतिशत हिस्सा रहेको नेपाल बिमा प्राधिकरण लुम्बिनी प्रदेश कार्यालयले जनाएको छ । बिमा नीति तर्जुमा गरी लागु गर्न, नेपाल सरकारको वित्तीय सुधार नीतिअनुरूप बिमालाई गाउँ–गाउँमा पुर्‍याउने कामलाई साकार पार्न, स्थानीय सरकारसँग समन्वय गरी बिमाको विकासलाई तीव्र रूपमा अगाडि बढाउन, नेपाली बिमा बजारको वर्तमान स्थितिको जानकारी गराउन र बिमाको दायरा बढाउनमा समन्वय गर्ने उद्देश्यका साथ बिमा प्राधिकरणले विभिन्न कार्यक्रम सञ्चालन गरिरहेको कार्यालयले जनाएको छ ।

नेपाल बिमा प्राधिकरणले बिमा कम्पनीको नियमन, निरीक्षण, सुपरिवेक्षण गर्ने, न्यून आय वर्गसमक्ष बिमाको पहुँच पुगाउने र लघुबीमाको प्रवर्धन गर्ने, बिमाको तर्फबाट अन्तर्राष्ट्रिय सम्बन्ध कायम राख्ने, बीमित हित संरक्षणसम्बन्धी कार्य गर्ने तथा बिमा नियामकको हैसियतमा अन्य काम गर्दैआएको छ ।