शङ्कर केसी
सल्यान, मङ्सिर १४ गते । कर्णाली प्रदेशका तीन जिल्लामा पुनर्निर्माण थालिएका १४ भूकम्प प्रभावित विद्यालय र स्वास्थ्य संस्था हस्तान्तरणको प्रक्रियामा छन् । जाजरकोट भूकम्पका कारण प्रभावित जिल्ला जाजरकोट, सल्यान र रुकुम पश्चिमका विद्यालय तथा स्वास्थ्य संस्था पुनर्निर्माण गरेर हस्तान्तरणको प्रक्रियामा रहेका हुन् ।
कर्णाली प्रदेशका मुख्यमन्त्री यामलाल कँडेलले प्रदेशले सुरु गरेको भूकम्प प्रभावित विद्यालय र स्वास्थ्य संस्था पुनर्निर्माण कार्यक्रम सुरु भएका ८१ वटामध्ये १४ वटा विद्यालय तथा स्वास्थ्य संस्था पुनर्निर्माण भई हस्तान्तरणको तयारीमा रहेको जानकारी दिनुभयो ।
उहाँले आइतबार सामाजिक सञ्जाल मार्फत जानकारी गराउँदै बाँकी अधिकांशको निर्माण कार्य पनि भइरहेको बताउनुभयो । साथै यस वर्ष थप गरेर कम्तीमा एक सय भूकम्प प्रभावित विद्यालय तथा स्वास्थ्य संस्था पुनर्निर्माण गर्ने प्रदेश सरकारको लक्ष्य रहेको पनि मुख्यमन्त्री कँडेलको भनाइ छ ।
उहाँले भन्नुभएको छ, “निर्माणको कामलाई लिएर केही स्थानहरूमा प्रगति सुस्त भएको गुनासोको आधारमा कार्यालयमार्फत सम्बन्धित व्यवसायीलाई ताकेता गरिएको छ ।’’ आफ्नो ठाउँमा भइरहेको कामबारे अनुगमन गरेर खबरदारी गर्न नागरिकहरुलाई कँडेलको आग्रह छ ।
