राजु लामिछाने
रुकुमपश्चिम, मङ्सिर १४ गते । नेकपा (एमाले) रुकुमपश्चिमले चुनावमार्फत ११ औँ महाधिवेशन प्रतिनिधि चयन गरेको छ । यही कात्तिक २७ देखि २९ गतेसम्म काठमाडौँमा हुने ११ औँ राष्ट्रिय महाधिवेशनका लागि प्रतिनिधि चयन सर्वसम्मत हुन नसकेपछि शनिबार साँझ अबेरसम्म मतदान चलेको थियो ।
गएराति नै सार्वजनिक मतपरिणाम अनुसार मतदानबाट छ जना प्रतिनिधि चयन भएको निर्वाच अधिकृत अधिवक्ता गणेश हमालले जानकारी दिनुभयो । उहाँका अनुसार खुलातर्फ दुई जना, महिला दुई जना, युवा एक जना र दलित एक जना गरी छ जना प्रतिनिधि चयन भएका छन् ।
खुलातर्फ नन्दराम देवकोटा र दिनेश चन्द, महिलातर्फ कौशिला केसी र हिमकुमारी केसी, युवातर्फ प्रकाश खड्का र दलिततर्फ शशीराम नेपाली चयन हुनुभएको छ । खुलातर्फ पार्टीका जिल्ला अध्यक्ष नन्दराम देवकोटासहित दिनेश चन्द र टंकप्रसाद ओली प्रतिस्पर्धामा रहेकामा देवकोटाले २८१, चन्दले २५४ पाएर प्रतिनिधि चयन हुनुभएको हो भने ओलीले १२२ मत पाउनुभएको छ ।
महिलातर्फ कौशिला केसी, हिमकुमारी केसी, तुलसा मल्ल र डण्डी कार्की प्रतिस्पर्धामा रहेका थिए । कौशिलाले २०४, हिमकुमारीले २०३ सहित महाधिवेशन प्रतिनिधि चयन भएकोमा डन्डीले ११६ र तुलसाले १११ मत पाएको निर्वाचन अधिकृत हमालले जनाउनुभयो ।
युवातर्फ प्रकाश खड्का र लालबहादुर बुढा प्रतिस्पर्धामा रहेकामा खड्काले १७७ र बुढाले १४६ मत पाउनुभयो । दलित तर्फ पार्टीका जिल्ला सचिव शशिराम नेपाली चयन हुनुभएको छ । नेपालीले २७ मत ल्याउदा प्रतिस्पर्धी खड्कबहादुर दमाईले १८ मत ल्याउनुभएको थियो ।
