रमेश विश्वकर्मा
गुल्मी, मङ्सिर १४ गते । गुल्मीमा मदन भण्डारी राजमार्ग अन्तर्गत तम्घास–सिमलटारी सडक खण्डमा चार पक्की पुलको निर्माण कार्य सम्पन्न भएको छ । यहाँको इस्मा गाउँपालिका, धुर्कोट गाउँपालिका र मालिका गाउँपालिका क्षेत्रभित्र रहेका चार वटा खोलामा पक्की पुल निर्माण गरिएको हो । पुल निर्माण नहुँदा निकै दुःख पाएका यस क्षेत्रका नागरिकहरु पुल निर्माणपछि निकै खुसी छन् ।
मदन भण्डारी राजमार्ग योजना कार्यालयअन्तर्गत यहाँको फूलबारी खोला, घमिर खोला, हुलाके खोला र धनार्जे रोदी खोला गरी चारवटा पक्की पुल निर्माण गरिएको छ । पुल नहुँदा वर्षाको समयमा पैदल यात्रीसँगै सवारीसाधनमा आवतजावत गर्दा समेत निकै ठुलो समस्या खेप्नुपरेको त्यस क्षेत्रका नागरिकले बताएका छन् । पुल निर्माणसँगै सञ्चालनमा आएपछि यात्रा गर्न निकै सहज भएको मालिका गाउँपालिकाका विष्णु विश्वकर्माले बताउनुभयो ।
यस क्षेत्रमा लामो समय र प्रयासपछि आव २०८१–०८२ मा एकै पटक चार पक्की पुल निर्माण गरिएको हो । सबै पुल सञ्चालनमा आएका छन् । तर निर्माण सम्पन्न भएका ति पुलको औपचारिक कार्यक्रम गरी उद्घाटन गरिएको छैन । समयै पुल निर्माण गर्नका लागि सबै सरोकारवाला सबै पक्षको उत्तिकै प्रयास रहेको थियो । निर्माण सम्पन्न भएको फूलबारी खोला पुल तीन करोड ३२ लाख ६८ हजार रुपियाँ र घमिर खोला पुल तीन करोड १३ लाख ८४ हजार रुपियाँमा निर्माण सम्पन्न गरिएको हो ।
यि दुवै पुलको निर्माणको कार्य पन्थ निर्माण सेवाले गरेको हो । हुलाके खोला पुल पाँच करोड ७९ लाख ५३ हजार रुपियाँ र धनार्जे रोदी खोला पुल सात करोड ४८ हजार रुपियाँ लागतमा निर्माण भएको हो । दुवै पुल निर्माणको कार्य सुनिल समिर निर्माण सेवाले गरेको मदन भण्डारी राजमार्ग योजना कार्यालय तम्घासले जनाएको छ । पश्चिम गुल्मीसँगै छिमेकी जिल्ला बागलुङ र प्यूठानसम्मका नागरिकहरु यहाँबाट आवतजावत गर्ने गर्छन् ।
