बर्दीबास समाचारदाता
बर्दीबास, मङ्सिर १४ गते । मधेशका बजारमा तरकारीको मूल्य बढ्दै गएपछि उपभोक्ताको रोजाइमा पहाडको उत्पादन परेको छ ।
तिहारयता तराईको स्थानीय उत्पादन काउली, बोडी, मुला, आलु, गोलभेँडा तथा विभिन्न सागसब्जीको मूल्य तीव्र गतिमा बढ्दै गएपछि उपभोक्ता ‘सस्तो र स्वादिलो’ विकल्पका रूपमा पहाडे तरकारी रोज्न थालेका हुन् ।
बर्दीबासलगायत तराईका प्रमुख बजारमा सिन्धुली र रामेछापबाट ल्याइने इस्कुस, फर्सी, बरेला, रुख टमाटर, रायोको साग, आलु, माहिली खुर्सानी तथा जुनार, सुन्तला, किवी जस्ता तरकारी र फलफूलले उपभोक्तालाई केही राहत दिएको स्थानीय उपभोक्ताको भनाइ छ ।
बर्दीबास बजारमा भेटिएकी मिथिला नगरपालिकाकी गृहिणी लक्ष्मी तामाङका अनुसार तराईको तुलनामा ‘सस्तो र स्वादिलो’ हुने भएकाले सम्भव भए जति पहाडका तरकारी नै प्रयोग गर्ने गरेको बताउनुभयो ।
स्थानीय बजारमा गत वर्ष १० रुपियाँ किलोमा पनि नबिकेको काउली अहिले १४० देखि १५० रुपियाँमा किन्न उपभोक्ता बाध्य छन् । भान्टा किलोको एक सय, आलु र गोलभेँडा ८०–९०, हरियो खुर्सानी एक सय, फर्सी ६०, तितेकरेला २४० र बेथेको साग पाउको ६० रुपियाँमा बिक्री भइरहेको छ । यही बजारमा पहाडका स्कुस एक सय रुपियाँमा चार किलो बिक्री भइरहेको छ । बरेला ६०, पहाडे आलु ७०, रुख गोलभेँडा ६०, हरियो फर्सी ३०, अदुवा एक सय र माहिली खुर्सानी ९० रुपियाँ किलोको दरमा उपलब्ध छन् । तुलनात्मक सस्तो मूल्यका कारण पहाडको उत्पादनप्रति उपभोक्ताको आकर्षण उच्च बनेको छ ।
त्यस्तै स्थानीय फलफूल बजारमा जुनार ७५ र सुन्तला १३० देखि १५० रुपियाँ प्रतिकिलोमा बिक्री भइरहेका बेला सिन्धुली र रामेछापका व्यापारीले भने ताजा जुनार एक सय रुपियाँको दुई किलो र सुन्तला प्रतिकिलो एक सय रुपियाँमा उपलब्ध गराएपछि पहाडका व्यापारीलाई बेच्न भ्याइनभ्याइ छ । सिन्धुली तीनपाटन–८, बाहुन तिल्पुङका व्यापारी होमराज श्रेष्ठका अनुसार बर्दीबासमा प्रतिबजार करिब १० जना व्यापारीले चार मिनी ट्रक बराबर पहाडमा उत्पादित तरकारी र फलफूल ल्याइरहेका छन् ।
