असुरक्षित भवनबाट सुरक्षाको प्रतिबद्धता

रेसुङ्गा समाचारदाता

रेसुङ्गा (गुल्मी), मङ्सिर १२ गते । टिनको छानाभित्र जाडोयाममा धेरै जाडो र गर्मी मौसममा निकै गर्मी हुने गर्छ । मालिका गाउँपालिका–४ को अर्खबाङ प्रहरी चौकीमा बर्सातका बेला पानी परे ब्यारेकमा चुहिएर भाँडा थाप्नुपर्ने बाध्यता छ । राम्रो घेरबार छैन, हुलहुज्जत भए चौकी आफैँ असुरक्षित छ । कुनै उजुरी लिएर नागरिक आए खुला चौरमा राखेर छलफल गर्नु पर्छ । अर्खबाङ स्वास्थ्य चौकीको पुरानो भवन जीर्ण तीन कोठाबाटै अर्खबाङ प्रहरी चौकीले कार्यसम्पादन गरेको छ । 

१२ जनाको दरबन्दीमा छ जना कार्यरत चौकीबाट चार वटा वडामा नागरिकको शान्तिसुरक्षाको काम गरिरहेको अर्खबाङ प्रहरी चौकी इन्चार्ज प्रहरी सहायक निरीक्षक मानबहादुर घर्तीले बताउनुभयो । उहाँले भन्नुभयो, “घाम डुबेपछि बाहिर उभिन सकिँदैन । पानी परे चुहिएर भित्र ओभानो हुँदैन ।” मालिका गाउँपालिका प्रमुख देवीराम अर्यालले चौकीका लागि जग्गा प्राप्तिको प्रक्रिया अगाडि बढाए पनि त्यसले निकास दिन नसकेको बताउनुभयो ।

२०५७ सालमा स्थापना भएको इस्मा गाउँपालिका–१ को हस्तीचौर प्रहरी चौकी जीर्ण घरमा भाडामा बस्दै आएको छ । लामो समय सहकारीमा बसेको चौकी हाल भाडाको जीर्ण घरमा आफूहरू कष्टपूर्ण रूपमा बस्दै आएको हस्तीचौर प्रहरी चौकीका प्रहरी सहायक निरीक्षक विनय श्रीवास्तवले बताउनुभयो । चार कोठामा आवास, ब्यारेक र कार्यालयको काम व्यवस्थापन गर्न निकै मुस्किल परिरहेको छ । खानेपानीको त्यस्तै खालको सङ्कटका कारण खानपान र सरसफाइमा मुस्किल परिरहेको उहाँले बताउनुभयो । 

शौचालय नहुँदा दिसापिसाब खाडल खनेर व्यवस्थापन गरिरहेको श्रीवास्तवले बताउनुभयो । उहाँले भन्नुभयो, “मान्छे आए बसेर छलफल गर्न सकिँदैन । खानेपानी, शौचालयसहित बस्न निकै अप्ठ्यारो छ ।” २०५६ सालमा स्थापना भएको कालीगण्डकी गाउँपालिका–७ को भुर्तुङ प्रहरी चौकी स्थानीयको कच्ची घरमा भाडा तिरेर लामो समय बस्यो । गत वर्ष प्रहरी चौकी पहिरोका कारण जोखिममा परेपछि नजिकको विद्यालय भवनमा भाडामा बस्दै आएको भुर्तुङ प्रहरी चौकीका इन्चार्ज प्रहरी सहायक निरीक्षक देवबहादुर भुजेलले जानकारी दिनुभयो । 

 २०४० सालमा स्थापना भएको पूर्तिघाट प्रहरी चौकी चार दशकसम्म भाडाको कच्ची घरमा बसेको छ । २०५३ सालमा स्थापना भएको मुसीकोटकै पौदी अमराई प्रहरी चौकी पनि भाडाकै कच्ची घरमा रहेको जिल्ला प्रहरी कार्यालय गुल्मीका प्रवक्ता प्रहरी नायब उपरीक्षक गङ्गाबहादुर सारुले जानकारी दिनुभयो । 

जिल्लामा जग्गा र भवन भएका आठ प्रहरी कार्यालय रहेका छन् । जग्गा र भवन भएका १२ र जग्गा र भवन नै नभएका १२ प्रहरी कार्यालय रहेको प्रवक्ता सारुले बताउनुभयो । केही चौकी अनिवार्य स्तरवृद्धि गर्नुपर्ने छन् । २०३२ सालमा स्थापना भएको वामी प्रहरी चौकी हो । मुसीकोट नगरपालिकाको मुकाममा भए पनि वामी प्रहरी चौकीको स्तरवृद्धि अझै नभएको सारुले बताउनुभयो । जिल्लामा प्रहरीको दरबन्दी ४४७ भए पनि कार्यरत ३६५ जना छन् ।

निकासा भए पनि गौडाकोटमा प्रहरी चौकी स्थापना भएको छैन । नेपाल सरकारको गृहमन्त्री ओमप्रकाश अर्याल र प्रहरी महानिरीक्षक दानबहादुर कार्कीको गृह जिल्ला पनि यही हो । देश र जनताको सुरक्षाका लागि खटिएका नेपाल प्रहरीले कतै भाडाको घर, त कतै टिनको छाप्रोमा बास बसेर भौतिक असुविधासहित सेवा प्रवाह गरिरहेका छन् । आफ्नै भवन नहुँदा सबैभन्दा बढी असर सेवा प्रवाहमा पर्ने जिल्ला प्रहरी प्रमुख प्रहरी उपरीक्षक नारायणप्रसाद अधिकारीले बताउनुभयो । उहाँले नेपाल प्रहरीले आफ्नोभन्दा जनताको शान्तिसुरक्षालाई प्रथामिकता दिएकाले असुविधाका बिच पनि कर्तव्यबाट विचलित नभएको बताउनुभयो ।