काठमाडौँ, मङ्सिर ३ गते । कृशन फिल्म्सको ब्यानरमा निर्माण भएको नेपाली कथानक चलचित्र ‘लोकन्ती’ यहि मङ्सिर २६ गते शुक्रबारदेखि देशभरका सिनेमा हलमा एकसाथ प्रदर्शनमा आउने भएको छ । चलचित्रको प्रदर्शन मितिसँगै फर्स्टलुक पोस्टर सार्वजनिक गरिएको छ।
परिवार, प्रेम, सङ्घर्ष, शान्ति र समाजका सूक्ष्म द्वन्द्वलाई कथाको केन्द्रमा राखेर तयार गरिएको चलचित्रलाई निर्देशक रञ्जित रानाले पूर्ण पारिवारिक ड्रामाको रूपमा पेस गरेका छन्।
चलचित्रमा अभिनेता एसराज गराच मुख्य भूमिकामा देखिँदै छन् । काभ्रे जिल्लाका वास्तविक र प्राकृतिक लोकेशनमा छायाङ्कन गरिएको ‘लोकन्ती’ ले पारिवारिक प्रेमकथाभित्र लुकेका सामाजिक संवेदनाहरू उजागर गर्ने लक्ष्य लिएको छ।
चलचित्रका निर्माता सन्तोष न्यौपाने हुनुहुन्छ । एसराजसँगै अभिनेत्री तथा मोडल ऋचा थापाको अनस्क्रिन केमिस्ट्री रहेको छ साथै, विमला लिम्बू, कुमार न्यौपाने र विकाश अधिकारी, दमन रूपाखेती, गोविन्द प्रभात लगायत कलाकारहरूको मुख्य भूमिका रहेको छ। यसै चलचित्र मार्फत कुमार न्यौपाने र विकाश अधिकारीले अभिनय यात्राको सुरुवात गरिरहेका छन्। आफ्नो डेब्यु चलचित्रलाई लिएर दुवै जना उत्साहित छन्।
सङ्गीत निर्देशनमा विकास चौधरी, छायाङ्कनमा रोनिश तामाङ च्याङ्बा रहेका छन्। नेपाली संस्कृतिमा आधारित भावनात्मक तथा सामाजिक कथानक बोकेको ‘लोकन्ती’ ले दर्शकलाई नयाँ स्वाद दिने अपेक्षा गरिएको छ।
