ह्यामिल्टन (क्यानाडा), कात्तिक २७ गते । अमेरिकी विदेशमन्त्री मार्को रुबियोले संयुक्त राष्ट्रसङ्घको सुरक्षा परिषदमा गाजाका लागि प्रस्तावित अन्तर्राष्ट्रिय सुरक्षा बलसम्बन्धी प्रस्तावबारे आशावाद व्यक्त गर्नुभएको छ ।
उहाँका अनुसार उक्त प्रस्तावलाई छिट्टै अन्तिम रूप दिने प्रयास सन्तोषजनक रूपमा अगाडि बढिरहेका छन् । “यो कार्यान्वयन हुने दिशामा अघि बढिरहेको छ भन्नेमा हामी आशावादी छौँ”, रुबियोले क्यानाडामा सम्पन्न जी-७ विदेशमन्त्रीको बैठकपछि पत्रकारलाई सम्बोधन गर्दै भन्नुभयो, “हामीले प्रस्तावको भाषामा उल्लेखनीय प्रगति गरिरहेका छौँ र आशा छ कि यसमा शीघ्र सहमति जुटाएर कार्यान्वयनको चरणमा पुग्नेछौँ ।”
विदेशमन्त्री रुबियोका अनुसार संयुक्त राज्य अमेरिकाले विभिन्न मुलुकसँग मिलेर ‘तिनीहरूको चासोलाई सन्तुलनमा राख्ने र सुरक्षा बलको संरचना कसरी हुने भन्ने विषयमा विस्तृत छलफल गरिरहेको’ छ । गत हप्तादेखि अमेरिकाले राष्ट्रपति डोनाल्ड ट्रम्पको समर्थनमा दुई वर्षदेखि जारी गाजाको युद्धमा युद्धविरामको लागि नयाँ मस्यौदा प्रस्ताव प्रसारित गर्न सुरु गरेको हो ।
ट्रम्प प्रशासनले विगतमा संयुक्त राष्ट्रसङ्घप्रति बारम्बार आलोचनात्मक धारणा राख्दै आएको भए पनि धेरै राष्ट्रले गाजामा कुनै पनि प्रकारको सैन्य तैनाथी गर्नु अघि सुरक्षा परिषद्को स्वीकृति अनिवार्य हुने स्पष्ट सङ्केत दिएका छन् । रुबियोले गाजामा अन्तर्राष्ट्रिय बलको तैनाथीले केवल प्यालेस्टिनी जनतालाई थप सहयोग नपुर्याउने मात्र नभई हमासलाई पनि कमजोर पार्ने प्रयासमा सहायक हुने विश्वास व्यक्त गर्नुभयो ।
“ तपाईंले केवल मानवीय सहायता मात्र होइन, पुनर्निर्माण र विकासको गति पनि तीव्र बनाउन चाहनुहुन्छ भने त्यसका लागि दिगो सुरक्षा अपरिहार्य हुन्छ”, उहाँले भन्नुभयो । उहाँले अन्तर्राष्ट्रिय समुदायलाई गाजामा स्थायित्व, पुनर्विकास र दीर्घकालीन शान्ति स्थापनाका लागि सामूहिक रूपमा अघि बढ्न आग्रह गर्नुभएको छ । रासस/एएफपी
