.jpg)
हरिकृष्ण शर्मा
मुक्तिनाथ (मुस्ताङ), कात्तिक २७ गते । उपल्लो मुस्ताङको लोमान्थाङ गाउँपालिका–२, नेचुङमा अवस्थित मुस्ताङ भन्सार कार्यालयले झण्डै साढे तीन अर्ब राजस्व सङ्कलन गरेको छ । अत्यधिक चिसोसँगै कोरला नाका आसपासका क्षेत्रमा हिमपात भए पनि चीनबाट आयात गरिएका समान धमाधम आउन थालेपछि कात्तिक २५ गतेसम्म तीन अर्ब ४९ करोड ८५ लाख ११ हजार रूपियाँ राजस्व सङ्कलन भएको हो ।
भन्सार कार्यालय प्रमुख रमेश खड्काले चिसोसँगै सवारीसाधनमा ढुवानीमा समस्या भए पनि भन्सार कार्यालयले आयात, निर्यात भइरहेको बताउनुभयो ।
भन्सार प्रमुख खड्काले भन्नुभयो, ‘‘भन्सार कार्यालयमा रोकिएका मालबाहक सवारीसाधन जाँचपास समेत भइरहेको छ, सडकमा जमेको हिउँ पन्छाउँदै भए पनि ढुवानीको काम भइरहेको छ ।’’ भन्सार कार्यालयले भदौ महिनाको ३० गतेदेखि व्यवसायीक रुपमा सेवा प्रवाह गरेपछि हालसम्म एक हजार ६९९ वटा विद्युतीय (ईभी) गाडीसहित ८२८ मालवाहक, कन्टेनरमार्फत सामान पैठारी भएको छ भने निकासीतर्फ नेपालमा उत्पादन हुने हस्तकला सामग्री, कपडा लगायतका सामान ४१ साना तथा मजौला ट्रकमार्फत पठाइएको छ ।
नेपालमा उत्पादन हुने सामानको चिनियाँ बजारमा खपतको वातावरण बनाउन त्यहाँका व्यवसायीसँगको सम्बन्ध स्थापनाका लागि कूटनीतिक पहल आवश्यक रहेको व्यवसायीको भनाइ छ । भन्सार कार्यालयबाट जाँचपास भएका सवारीसाधन एक सय ८६ किलोमिटर दूरीको कोरला–जोमसोम–बेनी सडकखण्ड सुधार नहुँदा ठुला कन्टेनर सञ्चालनमा समस्या भइरहेको छ । समुद्री सतहदेखि चार हजार ६ सय ५० मिटर उचाइमा अवस्थित कोरला नाकामा मङ्सिरदेखि माघसम्म चार फिटसम्म हिमपात हुन्छ ।
-square-thumb.jpg)
-original-thumb.jpg)
