ढाका, कात्तिक २१ गते । पूर्व महिला क्रिकेट कप्तान जहाँआरा आलमले बङ्गलादेश क्रिकेट बोर्ड (बिसिबी) का पूर्व र कार्यरत अधिकारीविरुद्ध यौन उत्पीडनको गम्भीर आरोप लगाएपछि बिसिबीले औपचारिक अनुसन्धान सुरु गरेको छ ।
३२ वर्षीया दायाँ हाते यी तेज बलरले हालै युट्युब च्यानलमा दिएको अन्तर्वार्तामा सन् २०२२ मा दक्षिण अफ्रिकामा सम्पन्न महिला क्रिकेट विश्वकपका क्रममा तत्कालीन टोली चयन कर्ता तथा प्रबन्धक मन्जुरुल इस्लामसहितका केही अधिकारीले आफूलाई र अन्य खेलाडीलाई यौन दुर्व्यवहार गरेको बताउनुभएको थियो ।
हाल चीनमा कार्यरत मन्जुरुल इस्लामले भने ती सबै आरोप ‘पूर्णरूपमा आधारहीन’ रहेको दाबी गर्दै अस्वीकार गर्नुभएको छ । उहाँले सन् १९९९ देखि २००४ सम्म बङ्गलादेशका लागि १२ टेस्ट र ३४ एकदिवसीय (एकदिवसीय) खेल खेल्नुभएको थियो । जहाँआराले सन् २०२२ को विश्वकपका क्रममा घटेको एक घटनाको स्मरण गर्दै मन्जुरुलले ‘अनुचित शारीरिक सम्पर्क गरेको’ आरोप लगाउनुभएको छ ।
उहाँका अनुसार मन्जुरुलले प्रोत्साहनका नाममा ‘महिला खेलाडीलाई बारम्बार अँगालो हाल्ने वा छातीमा हात राख्ने’ जस्ता कार्य गर्ने गर्नुहुन्थ्यो । मन्जुरुलले त्यस आरोपलाई पूर्ण अस्वीकार गर्दै भन्नुभयो, “तपाईं टोलीका अरु खेलाडीलाई सोध्न सक्नुहुन्छ, ती सबै कुरा झुटा हुन् ।”
जहाँआराले बङ्गलादेशका लागि १३५ वटा अन्तर्राष्ट्रिय सेतो बल खेल खेल्नुभएको थियो, जसमा उहाँले एकदिवसीय क्रिकेटमा ४८ विकेट र टी-२० अन्तर्राष्ट्रियमा ६० विकेट लिनुभएको छ । उहाँले बिसिबीका अन्य अधिकारीको नाम पनि सार्वजनिक गर्दै यसअघि बोर्डलाई औपचारिक पत्रमार्फत जानकारी गराएको तर कुनै कारबाही नभएको खुलासा गर्नुभएको छ ।
बङ्गलादेश क्रिकेट बोर्डले यस विषयमा छानबिन गर्न विशेष समिति गठन गरेको छ । समितिले १५ कार्य दिनभित्र आफ्नो प्रतिवेदन पेश गर्ने बताइएको छ । बिसिबीले बिहीबार राति सार्वजनिक गरेको विज्ञप्तिमा ‘सुरक्षित, सम्मानजनक र व्यावसायिक कार्य वातावरण सुनिश्चित गर्ने आफ्नो प्रतिबद्धता’ दोहोर्याएको छ ।
“हामीले यो विषय गम्भीरताका साथ अनुसन्धान गर्नुपर्छ, किनकि यसले खेल क्षेत्रमा नकारात्मक सन्देश दिन सक्छ”, बिसिबीका उपाध्यक्ष शाखावत हुसेनले भन्नुभयो । यस घटनाले बङ्गलादेश क्रिकेटमा लैङ्गिक सुरक्षा र पेशागत आचारसंहिताबारे गम्भीर प्रश्न उठाएको बताइँदैछ । रासस/एएफपी
