शिवकुमार रिजाल (काशी)
मनहरी (मकवानपुर), कात्तिक २१ गते । पश्चिम मकवानपुरको दुर्गम गाउँबस्तीहरुमा गरिएको अबैध लागुऔषध गाँजा खेती नष्ट गरिएको छ । तीन दिनको अवधिमा परिचालित प्रहरी टोलीले मकवानपुर जिल्लाको राक्सिराङ गाउँपालिकाभित्रका विभिन्न क्षेत्रमा लगाइएको ३० बिघा १० कट्ठा जग्गाको गाँजा नष्ट गरिएको जिल्ला प्रहरी कार्यालय मकवानपुरले जनाएको छ ।
गत कात्तिक १७ गतेदेखि २० गतेसम्म जिल्ला प्रहरी कार्यालय, सशस्त्र प्रहरी बल १४ नम्बर गण हेटौँडाबाट खटिएका १०२ जना प्रहरीले गाँजा फँडानी गरेको हो । जिल्ला प्रहरी कार्यालय मकवानपुरले दिएको जानकारीअनुसार राक्सिराङ गाउँपालिकाको चिसापानी, बेलटार, टेम्टा, गोरेटार र देबुटार गाउँमा गाँजा नष्ट गरिएको हो ।
त्यसैगरी कैलाश गाउँपालिकाको सातकन्या, खैरेनी र जोइटी क्षेत्र तथा भीमफेदी गाउँपालिकाको भदौरे, ज्यार्बु लगायतका क्षेत्रमा गाँजा फँडानी गरिएको छ । गत वर्षहरुझैँ मकवानपुरको कैलाश र राक्सिराङसहितका गाउँबस्तीमा गाँजा खेती गरिएको छ ।
लागूऔषध नियन्त्रण ऐन २०३३ ले निषेध गरेको गाँजाखेतीको खुला उत्पादन, ओसारपसार र भण्डार हुने क्षेत्रको रुपमा पश्चिम मकवानपुरका गाउँबस्तीहरु तीन दशकदेखि चर्चित छ ।
हरेक वर्ष प्रहरीले गाँजा फँडानी अभियान सञ्चालन गरे पनि पर्याप्त जनशक्ति र समय नहुँदा गाँजा खेतीले निरन्तरता पाइरहेको छ । पश्चिम मकवानपुरको ग्रामीण भेगहरुमा गाँजासँगै अफिमको उत्पादन बढ्दो क्रममा रहेको जनप्रतिनिधिहरुले बताएका छन् ।
