गोकुल भुजेल
भोजपुर, कात्तिक १० गते । भोजपुरको उत्तरी क्षेत्र षडानन्द नगरपालिका र साल्पासिलिछो गाउँपालिकालाई सङ्खुवासभा जिल्ला हुँदै तराईसँग जोड्ने अरुण नदीको सतिघाटमा सोमबारदेखि फेरी सञ्चालन भएको छ ।
नदीमा पानीको बहाव बढेसँगै गत जेठ १६ गतेबाट बन्द भएको फेरी क्रमशः नदीमा पानीको बहाव कम हुँदै गएपछि पुनः सञ्चालनमा ल्याएको हो । जिल्लाको उत्तरी क्षेत्रमा सवारीसाधन, दैनिक उपभोग्य बस्तु, खाद्यान्न, कच्चापदार्थ, यात्रु आवतजावतका लागि महत्त्वपूर्ण एवम् वैकल्पिक माध्यमको रुपमा रहेको फेरी षडानन्द नगरपालिका आफैँले व्यवस्थापन गरी सञ्चालन गरेको नगरपालिकाकी उपप्रमुख प्रमिला राईले जानकारी दिनुभयो ।
उहाँका अनुसार, सङ्घीय सांसद क्षेत्र विकास कोषबाट ७५ लाख, प्रदेश सांसद क्षेत्र विकास कोषबाट ७५ लाख र षडानन्द नगरपालिकाको ५५ लाखमा फेरी निमार्ण गरी सञ्चालन हुँदै आएको छ । दैनिक एक सयभन्दा बढी साना ठुला सवारीसाधन तार्ने फेरीले एक पटकमा चार वटा सवारीसाधन, सामग्री तथा यात्रु तार्ने गर्दछ ।
विगतमा फेरी सञ्चालन नहुँदा उक्त क्षेत्रका मानिसहरू घण्टै लगाएर घुमाउरो सडक तथा भर्खरै निमार्ण सम्पन्न भएको कात्तिकेको बाटो प्रयोग गर्न बाध्य छन् । कात्तिके हुँदै तुम्लिङटार जाने सडक मर्मत नहुँदा खाल्डाखुल्डी, भत्किएको तथा जोखिमपूर्ण नै छ ।
अरुण नदीको सतीघाटमा पक्की पुल लगाउन वर्षाैंदेखि पहल भए पनि अहिलेसम्म पुल बन्न सकेको छैन । जसले गर्दा स्थानीयले बर्खायाममा बर्सेनि सास्ती खेप्दै आएका छन् ।
