खेमराज सापकोटा
रानी (विराटनगर) जेठ २३ गते । सञ्चार तथा सूचना प्रविधिमन्त्री पृथ्वीसुब्बा गुरुङले चालु बजेट अधिवेशनबाट विद्यालय शिक्षा र निजामती सेवा ऐन जारी हुने बताउनुभएको छ । शुक्रबार बिहान विराटनगर विमानस्थलमा सञ्चारकर्मीहरुसँगको अन्तरक्रियाका क्रममा उहाँले यस्तो बताउनुभएको हो ।
विकसित राजनीतिक घटनाक्रमका बारेमा मन्त्री गुरुङले पूर्व प्रधानमन्त्री माधवकुमार नेपालसहितलाई मुद्दा दर्ता गरेको विषयमा अख्तियारको नियमित काम भएको बताउनुभयो । उहाँले भन्नुभयो, ‘‘अख्तियार सरकारको समेत निगरानी गर्ने निकाय हो ।’’
उहाँले गृहमन्त्री रमेश लेखकमाथि विपक्षीहरूले राजनीतिक प्रतिशोध साँधेको बताउनुहुँदै उहाँले राजीनामा दिनुनपर्ने बताउनुभयो ।
सञ्चारमन्त्री गुरुङ गोरखापत्र संस्थानको पूर्व क्षेत्र प्रकाशन विराटनगर कार्यालयको निरीक्षणलगायत विभिन्न कार्यक्रममा सहभागी हुन विराटनगर आउनुभएको हो ।
