काठमाडौँ, वैशाख २० गते। महिला नेतृत्व र उद्यमशील क्षमताको विस्तार गर्दै आत्मनिर्भर समाज निर्माणमा टेवा पुर्याउने उद्देश्यले प्रदेश युवा परिषद्, बागमतीको आयोजनामा सम्पन्न भएको छ।
‘उद्यमशीलता विकास सम्बन्धी क्षमता अभिवृद्धि तालिम’ सहभागी महिला उद्यमीहरूका लागि प्रेरणादायी संवाद, ज्ञान हस्तान्तरण र सशक्तिकरणको ऐतिहासिक अवसरका रूपमा चिनिएको छ।
कार्यक्रमको प्रमुख आकर्षणका रूपमा नेपालका पहिलो महिला राष्ट्रपति विद्यादेवी भण्डारीको उपस्थितिले तालिमलाई विशेष बनाएको थियो। पूर्व राष्ट्रपति भण्डारीले अन्तरक्रियामा भन्नुभयो, “उद्यमशील महिलाहरू देशको विकास र परिवर्तनको मेरुदण्ड हुन्। तपाईंहरूले लिएको यो यात्राले समाजलाई मात्र होइन, पुस्ता नै बदल्न सक्छ। निरन्तरता, लगनशीलता र सकारात्मक सोच नै सफलता प्राप्तिको मूलमन्त्र हो।”
कार्यक्रममा प्रदेश युवा परिषद्का कार्यकारी उपाध्यक्ष सन्तोष चौलागाईले तालिमको औचित्यमाथि प्रकाश पार्दै यसलाई “प्रेरणादायी संवाद र ज्ञान हस्तान्तरणको सुनौलो अवसर” का रूपमा परिभाषित गर्नुभयो।
तालिमको अवधिमा सहभागीलाई व्यवसाय सुरुवात गर्ने प्रक्रियादेखि लिएर बजारीकरण, वित्तीय व्यवस्थापन, नवप्रवर्तन, नेतृत्व विकास, नेटवर्किङ तथा सरकारी नीतिगत ढाँचा सम्बन्धी व्यावसायिक जानकारी दिइयो। सहभागीले आफ्नो सीप र दृष्टिकोणमा व्यापक रूपान्तरण भएको अनुभव साटेका थिए।
सहभागी उद्यमीका अनुभूति
“मैले व्यवसाय गर्न सक्छु भन्ने आत्मविश्वास पहिलोपटक यही तालिमले दिएको हो,” एक सहभागीले भन्नुभयो, “पूर्व राष्ट्रपतिसँग प्रत्यक्ष बोल्न पाउनु भनेको हाम्रो लागि सपना जस्तै हो। उहाँको कुराले हाम्रो सोच नै फरक बनायो।”
तालिमले गाउँ तथा सहरका विभिन्न भेगबाट आएका महिलालाई एउटै मञ्चमा ल्याएर उनीहरूबिच सीप, विचार र अनुभवको आदानप्रदान गराएको थियो। यसले महिला उद्यमीको नयाँ सञ्जाल निर्माण गर्ने आधार तयार गरेको छ।
युवा परिषद्ले आगामी दिनमा तालिमबाट उत्पन्न भएका योजना र व्यवसायलाई प्राविधिक तथा परामर्श सेवा दिँदै थप सुदृढ बनाउने तयारी गरिरहेको छ। तालिमपछि केही सहभागीले समूहमा मिलेर सहकारी तथा लघु उद्यम थालनीको तयारी समेत थालेको जानकारी दिइएको छ।
-square-thumb.jpg)
-original-thumb.jpg)
