प्रतिमा थापा
कक्षाः १०, रूबी भ्याली स्कुल
सूर्यविनायक, भक्तपुर
समाई हात देखाई बाटो तिमीले पढायौ
क–ख र एक–दुई लेख्न मायाले सिकायौ,
आमाबाबुपछि तिमी भगवान्, तिमी नै सर्वस्व
अमूल्य धन किताबको ज्ञान भनेर बुझायौ ।
अन्धकारलाई हटाई तिमीले सदमार्ग देखायौ
ठुलोलाई सम्मान सानोलाई माया गर्न सिकायौ,
माझी झैँ तिमीले ज्ञानको सागर हामीलाई तरायौ
गल्ती गरी डराएर लुक्दा तिमीले बोलायौ ।
अञ्जानमा भएका गल्तीलाई सुधार गर्न सिकायौ
निराश हुनु हुन्न भनी पटक पटक मुस्कान छायौ,
कसरी बयान गरुँ ती हजुरका महान् कामलाई ?
तिम्रा गुन कसरी तिरौँ ? गाह्रो पो बनायौ । ।
