• २१ चैत २०८१, बिहिबार

बागलुङका तीन सडकको काम तोकेको समय अघि नै सक्ने लक्ष्य

blog

बागलुङ नगरपालिका वडा नं. १ को गणेश घुम्तीदेखि निरयघाट जोड्ने सडकमा काम गर्दै मजदुरहरु । तस्बिर : रामकृष्ण बोहरा

रामकृष्ण बोहरा
बागलुङ, चैत २० गते ।
कतिपय पूर्वाधारका योजना तोकेको समय सकिँदा आधा पनि निर्माण नभएर पटक–पटक म्याद थपिएका छन् । तर बागलुङका तीनवटा सडकको संयुक्त योजना भने तोकेको समय अघि सकिने गरी काम भएको छ ।

असार मसन्तको म्याद भए पनि चालु वर्षको जेठ मसान्तभित्रै सक्ने गरी तीन सडक निर्माणको काम धमाधम भइरहेको छ । बागलुङ नगरपालिका वडा नं. १ को गणेश घुम्तीदेखि निरयघाट, वडा नं. ४ को ओडारचौरदेखि ढोडेनी र वडा नं. ७ को मूलपानीदेखि तितौरी जोड्ने सडकको संरचनातर्फको काम सकिएको हो ।

गत साउनदेखि काम थालेको निर्माण कम्पनीले वडा नं. १ को चैतभित्रै, वडा नं. ४ मा वैशाखभित्रै र वडा नं. ७ मा जेठभित्रै काम सक्ने लक्ष्य बनाएको इन्जिनियर मनोज शर्माले जानकारी दिनुभयो । बागलुङ नगरपालिकाले सहरी शासकीय तथा पूर्वाधार विकास कार्यक्रममार्फत आगामी असार मसान्तभित्र सक्ने गरी वडा नं. ७ को मुलपानीदेखि तितौरे सम्मको साढे ८ किमी, ओडारचौरदेखि ढोडेनी सम्मको साढे २ किमी र गणेशघुम्तीदेखि निरयघाटको डेढ किमी सडक निर्मण गरिरहेको हो ।

विश्व बैंकको अनुदान सहयोगमा बागलुङ नगरपालिकाले ४५ करोडमा तीन सडक निर्माण गरेको हो । आशिष फेवा संयुक्त निर्माण कम्पनीले तोकेकै समयमा काम सक्ने लक्ष्य बनाएको हो । सडक निर्माणले अहिलेसम्म ५० प्रतिशत प्रगति भएको इन्जिनियर शर्माको दाबी छ । ‘‘हामीले संरचनाको काम सकेका छौं, कतिपय स्थानमा सब–बेस पनि बिच्छ्याइसक्यौं,’’ शर्माले भन्नुभयो, ‘‘चैत मसान्तमा गणेश घुम्तीदेखि नियरघाट जोड्ने सडकमा कालोपत्रे हुनेछ ।’’

असार मसान्तभित्रै काम सक्न कम्पनीले रातिसमेत काम गरिरहेको छ । समयमा काम सक्न खोज्दा केही स्थानमा धुलोको समस्याले स्थानीयलाई असर परे पनि अहिले नियमित पानी राखेर धुलो रोकेर काम भइरहेको छ । प्राविधिक काममा असर नपरे समयमा काम सकेर सडक हस्तान्तरण गर्ने निर्माण कम्पनीको योजना छ ।

यी सडक निर्माण भएमा ग्रामीण बस्तीका किसानले उत्पादन गर्ने दूध र तरकारीको बजारीकरणमा सहज हुनेछ । त्यसबाहेक बागलुङका अधिकांश नागरिकको मृत्यु पछिको दाहसंस्कार गर्ने काममा पनि सहज सडक बन्नेछ । निरयघाट जाने सडक सहज भएमा वृद्धाश्रम, निर्माणाधीन मानवसेवा आश्रम समेतलाई सहज हुनेछ ।

यी तीनवटै सडकहरु ६ देखि ८ मिटर चौडाका हुनेछन् । विश्व बैंकले नेपालभर १७ वटा नगरपालिकामा सहरी शासकीय सुधार तथा पूर्वाधार विकास कार्यक्रममा सहयोग गरेकोमा बागलुङमा पनि सडकको काम भएको हो । यसअघि विश्व बैंककै सहयोगमा बागलुङको वडा नं. ४ देखि ६ सम्मको नगरको चक्रपथमा झण्डै ७ किलोमिटर सडक कालोपत्रे भइसकेको छ ।

बागलुङ नगरपालिकाका प्रमुख बसन्तकुमार श्रेष्ठले नगरसभाले प्राथमिकीकरण गरेका १, २ र ३ नम्बरका सडकमा उक्त लगानी भएको बताउनुभयो । ‘‘जनताको हितका लागि काम गरेको हो, त्यसैले समयमा सक्नका लागि पहल भएको छ’’ श्रेष्ठले भन्नुभयो, ‘‘यो सडक समयमा सकिँदा अन्य परियोजना ल्याउन पनि सहज हुनेछ ।’’