उपकुलपति अन्तर्राष्ट्रिय सम्मेलन हुने

भैरहवा समाचारदाता

भैरहवा, चैत २० गते । बुद्ध जन्मस्थल लुम्बिनीमा उपकुलपतिको अन्तर्राष्ट्रिय सम्मेलन हुने भएको छ । चौथो औद्योगिक क्रान्तिका लागि मानव संसाधनका विकास र उच्च शिक्षासम्बन्धी विश्वव्यापी संवादलाई प्रवर्धन गर्नका लागि यही चैत २० र २१ गते सम्मेलन हुन लागेको हो । लुम्बिनी बौद्ध विश्वविद्यालयको आयोजना, विश्वविद्यालय अनुदान आयोगको सहयोग र ग्लोबल युनिभर्सिटी नेटवर्कको सहकार्यमा कार्यक्रम तय गरिएको विश्वविद्यालयले जनाएको छ । 

उच्च शिक्षामा बौद्धदर्शन अन्तर्राष्ट्रिकरण, प्राज्ञिक नेतृत्वमा बौद्धदर्शन र नैतिकता, चौथो औद्योगिक क्रान्तिमा उच्च शिक्षाको अन्तर्राष्ट्रियकरण, नेपालको उच्च शिक्षाका चुनौती र अवसर विषयमा केन्द्रित रही उपकुलपति सम्मेलन हुने लुम्बिनी बौद्ध विश्वविद्यालयका उपकुलपति प्राडा सुवर्णलाल वज्राचार्यले बताउनुभयो । बौद्ध विश्वविद्यालयको केन्द्रीय कार्यालय, लुम्बिनीमा हुन लागेको सम्मेलनमा पहिलो दिन उद्घाटन सत्रपछि मानव संसाधन व्यवस्थापनमा बौद्धदर्शनको उपयोग, श्रम बजारमा कृत्रिम बौद्धिकता (एआई) को प्रयोग, उच्च शिक्षाका लागि क्षेत्रीय सहयोग र सञ्जाल निर्माण तथा मानव संसाधन व्यवस्थापनमा संस्थागत भूमिका विषयमा २४ वटा कार्यपत्र प्रस्तुत हुने छन् । सम्मेलनमा ११ देशका अध्येताले कार्यपत्र प्रस्तुत गर्ने कार्यक्रम तय भएको छ । दोस्रो दिन उपकुलपति सम्मेलन हुने छ । उपकुलपति सम्मेलनमा नेपाल, भारत, जापानका विश्वविद्यालयका उपकुलपतिको सहभागिता रहने छ । सम्मेलनमा नेपाल, कम्बोडिया, चीन, जर्मनी, भारत, जापान, लाओस्, म्यान्मार, श्रीलङ्का, थाइल्यान्ड र भियतनामका विज्ञ तथा अध्येताको सहभागिता रहने जानकारी दिइएको छ ।