गर्मी बढेसँगै बिरामी पनि बढ्दै

बुटवल समाचारदाता

बुटवल, चैत २० गते । जाडो सकिएर गर्मी बढ्दै जाँदा मौसम परिवर्तनले निम्त्याउने विभिन्न स्वास्थ्य समस्या लिएर बुटवलका अस्पतालमा उपचारका लागि आउने बिरामीको सङ्ख्या बढ्दै गएको छ ।  सबैभन्दा बढी मौसमजन्य रोग भाइरल ज्वरो, रुघाखोकी,  घाँटी दुख्ने जस्ता समस्या लिएर बुटवलका सरकारी तथा निजी अस्पतालमा उपचारका लागि बिरामीको सङ्ख्यामा वृद्धि भएको हो । 

लुम्बिनी प्रादेशिक अस्पताल बुटवलका अनुसार फागुनदेखि नै मौसमजन्य रुघाखोकी, भाइरल ज्वरो र घाँटी दुख्नेलगायतका समस्या लिएर बिरामी उपचारका लागि आउने गरेका छन् । अस्पतालका मेडिकल सुपरिन्टेन्डेन्ट डा. इन्द्र ढकालले लुम्बिनी प्रादेशिक अस्पताल बुटवलमा अहिले दैनिक एक हजार पाँच सयभन्दा बढी बिरामी उपचारका लागि आउने गरेको बताउँदै त्यसमध्ये दैनिक दुई सयभन्दा बढी भाइरल रोगजन्य बिरामी रहेको बताउनुभयो । 

मौसम परिवर्तन हुने बेलामा मौसमजन्य बिरामीको सङ्ख्या बढ्ने बताउँदै उहाँले यो क्रम अझै केही समय लम्बिने बताउनुभयो । बेलैमा सजगता नअपनाउने हो भने मौसमजन्य प्रकोपले ज्यानै जान सक्ने भन्दै उहाँले बेलैमा उपचार गर्न सुझाव दिनुभयो । 

यसै गरी बुटवलकै सिद्धार्थ बाल तथा महिला अस्पतालमा पनि रुघाखोकी, भाइरल ज्वरो तथा टाउको दुख्ने जस्ता सङ्क्रमणजन्य बिरामी बढेका छन् । अस्पतालका चिकित्सक डा. रूपेश अधिकारीले महिला तथा बालबालिकामा अहिले रुघाखोकी र ज्वरो आउने समस्या देखिएको बताउनुभयो । उहाँले मौसममा आउने परिवर्तनका कारण केही समय यस्ता बिरामीको सङ्ख्या बढ्ने उल्लेख गर्नुभयो । 

चिकित्सक डा. कृष्ण खनालका अनुसार जाडो सकिएर गर्मी लाग्दै गएकोले भाइरल ज्वरो, रुघाखोकीलगायतका बिरामीको सङ्ख्यामा वृद्धि भएको हो । लुम्बिनी प्रादेशिक अस्पताल बुटवलमा सामाजिक सेवा एकाइमार्फत ६० देखि ८० वर्षसम्मका ज्येष्ठ नागरिकलाई ५० प्रतिशतसम्म सहुलियतमा उपचार सेवा उपलब्ध गराएको छ । 

अस्पतालले लक्षित समूहलाई तीन प्रकारको सेवा प्रवाह गर्दै आएको छ । जसमा बहिरङ्ग सेवामा दुई हजार पाँच सयसम्मको जाँच र उपचार सेवा निःशुल्क, आकस्मिक सेवातर्फ पाँच हजारसम्मको सेवा उपचार निःशुल्क छ । 

त्यसै गरी अस्पतालमा ८० वर्षमाथिका ज्येष्ठ नागरिकलाई शल्यक्रिया तथा भर्ना भएका बिरामीलाई १० हजारसम्म निःशुल्क सेवा प्रदान गर्ने गरिएको छ । 

सामाजिक सेवा एकाइले २४ घण्टा नै सेवा दिँदै आएको छ । सरकारले लक्षित समूहलाई छिटोछरितो र निःशुल्क सेवा दिने उद्देश्यका साथ लुम्बिनी प्रादेशिक अस्पताल बुटवलसहित देशभरका ४४ वटा अस्पतालमा एकाइ सञ्चालन गर्दै आएको छ ।