दुई विद्यालयमा दश लाखको अक्षयकोष

साधन घर्ती
म्याग्दी (दरबाङ), चैत २० गते । म्याग्दीको मालिका गाउँपालिका–४,ओखरबोटस्थित ओखरबोट माविमा दिवङ्गत आफन्तको सम्झनामा पाँच लाख रुपियाँको अक्षयकोष स्थापना गरिएको छ । ओखरबोटका स्व. कलबिर पुनको स्मृति तथा सम्मानमा परिवारले सो अक्षयकोष स्थापना गर्नुभएको हो ।

पूर्व गोर्खा सैनिक समेत रहनुभएका स्व.कलबिरकी श्रीमति भीमसरा पुन, छोराहरु इन्द्रबहादुर पुन, यामबहादुर पुन, उदारबहादुर पुन र सोमबहादुर पुनलगायत बुहारी र नातिनातिनाले अक्षयकोष स्थापनाका लागि सहयोग गर्नुभएको विद्यालयका प्रअ नविन कार्कीले जानकारी दिनुभयो ।

कलबिरको गत माघ २ गते बेलायतमा निधन भएको थियो । गरिव तथा जेहेन्दार विद्यार्थीलाई छात्रवृत्ति प्रदान गर्ने उद्देश्यले स्थापना भएको कोषलाई कलबिर स्मृति छात्रवृत्ति अक्षयकोष नामाकरण भएको छ । कलविरका परिवारका सदस्यहरुले मङ्गलबार विद्यालयमा आयोजित कार्यक्रममा अक्षयकोषको रकम हस्तान्तरण गर्नुभयो ।

यसैगरी, अन्नपूर्ण गाउँपालिका–३, दानास्थित ज्ञान प्रकाश नमुना माविको अक्षयकोषलाई पनि दानाका स्व.बुवा हस्तबहादुर पुर्जा मगरको सम्झनामा चार छोरीहरुले पाँच लाख ५५५ रुपियाँ सहयोग गर्नुभएको छ । विद्यालयका प्रअ शान्तबहादुर नेपालीका अनुसार , छोरीहरु यामकुमारी पुर्जा गुरुङ, राजकुमारी तिलिजा, डिलकुमारी पुर्जा र शर्मिला पुर्जा गुरुङले उक्त रकम विद्यालयमा स्थापित शिक्षा बिकास अक्षयकोषलाई सहयोग गर्नुभएको हो । सोही अवसरमा उहाँहरुले उक्त विद्यालयमा उत्कृष्ट हुने दुई छात्रा÷छात्रलाई वार्षिक बीस हजार रुपियाँको पुरस्कार घोषणा गरेर सहयोग गर्नुभएको छ ।